ٹیلی کام ٹیرف پالیسی کی خلاف ورزی پر چین نے بھارت کے خلاف مقدمہ دائر کر دیا

چین نے بھارت کے خلاف عالمی تجارتی ادارے ورلڈ ٹریڈ آرگنائزیشن WTOمیں باضابطہ مقدمہ دائر کر دیا ہے، جس میں چینی حکام کا موقف ہے کہ بھارت کی بعض تجارتی پالیسیاں اور اقدامات چینی مصنوعات کے لیے نقصان دہ ہیں اور عالمی تجارتی قوانین کی خلاف ورزی کے زمرے میں آتی ہیں۔

چینی وزارت تجارت کے مطابق بھارت کی نافذ کردہ کچھ پالیسیوں نے چینی مصنوعات کو بھارتی مارکیٹ میں مشکلات سے دوچار کر دیا ہے، اور یہ منصفانہ تجارتی اصولوں کے منافی ہیں۔

 چین نے عالمی تجارتی فورم سے رجوع کرکے مطالبہ کیا ہے کہ بھارت اپنی متنازع تجارتی پالیسیوں میں فوری اصلاح کرے۔

خصوصی طور پر چین نے بھارت کی ٹیلی کام ٹیرَف پالیسی کو نشانہ بنایا ہے اور کہا ہے کہ اسے درست کیا جائے تاکہ چینی مصنوعات کو برابری کی بنیاد پر مارکیٹ میں داخل ہونے کا موقع ملے۔

ماہرین کا کہنا ہے کہ یہ قدم چین اور بھارت کے درمیان پہلے سے موجود تجارتی کشیدگی میں مزید اضافہ کر سکتا ہے اور دونوں ممالک کے تجارتی تعلقات پر اثر انداز ہو سکتا ہے۔