ملک میں ہفتہ وار مہنگائی میں کمی
ملک میں ہفتہ وار بنیادوں پر مہنگائی کی شرح میں 0.09 فیصد کی معمولی کمی ہوئی جبکہ سالانہ بنیادوں پر مہنگائی کی مجموعی شرح 2.83 فیصد پر آگئی۔
ادارہ شماریات نے ہفتہ وار مہنگائی کی رپورٹ جاری کردی جس کے مطابق ایک ہفتے میں 13 اشیاء ضروریہ کی قیمتوں میں اضافہ ہوا اور 11 اشیاء سستی ہوئیں جبکہ 27 کی قیمتیں مستحکم رہیں۔
حالیہ ہفتے میں پسی ہوئی مرچ کی قیمت میں 6.26 فیصد، چکن 5.29 فیصد، کیلے 2.46 فیصد مہنگے ہوئے۔
ادارہ شماریات کی ہفتہ وار رپورٹ کے مطابق پہلی سہ ماہی کے بجلی چارجز 1.67 فیصد بڑھ گئے، جس کے بعد بجلی چارجز 6 روپے سے بڑھ کر 6 روپے 10 پیسے فی یونٹ ہوگئے۔
ادارہ شماریات کی ہفتہ وار رپورٹ کے مطابق لہسن، انڈے، گھی اور مٹن کی قیمتوں میں بھی اضافہ ہوا، جبکہ حالیہ ہفتے آلو 10.37 فیصد، ٹماٹر9.64 ، چینی 4.22 ، دال چنا 1.76 اور پیاز کی قیمتوں میں 7.43 فیصد تک کمی ہوئی۔ اس کے علاوہ ایل پی جی، دال مسور اور گڑ کی قیمتوں میں بھی کمی ہوئی۔