وینزویلا پر امریکی حملہ، پاکستان کو تشویش، فوجی کارروائی یو این چارٹر کی خلاف وزری قرار

پاکستان نے اقوام متحدہ کی سلامتی کونسل میں وینزویلا کے معاملے پر امریکی اقدامات پر سخت تشویش کا اظہار کیا ہے۔ وینزویلا کی صورتحال پر بلائے گئے سلامتی کونسل کے ہنگامی اجلاس سے خطاب کرتے ہوئے پاکستان کے قائم مقام مندوب عثمان جدون نے کہا کہ کیریبین خطے میں بڑھتا ہوا عدم استحکام نہ صرف علاقائی بلکہ عالمی امن و سلامتی کے لیے بھی خطرناک ہے، خصوصاً ایسے وقت میں جب دنیا پہلے ہی متعدد بحرانوں سے نبرد آزما ہے۔

انہوں نے زور دیا کہ اقوام متحدہ کے چارٹر کے تحت کسی بھی ریاست کی علاقائی سالمیت یا سیاسی خودمختاری کے خلاف طاقت کے استعمال یا اس کی دھمکی سے اجتناب ضروری ہے، جبکہ یو این منشور ممالک کو ایک دوسرے کے اندرونی معاملات میں مداخلت سے بھی روکتا ہے۔

عثمان جدون نے یکطرفہ فوجی کارروائی کو یو این چارٹر اور ریاستی خودمختاری کے اصولوں کی صریح خلاف ورزی قرار دیتے ہوئے خبردار کیا کہ ایسے اقدامات عالمی قانونی نظام کی بنیادوں کو کمزور کر سکتے ہیں اور ان کے نتائج طویل عرصے تک غیر متوقع اور بے قابو رہ سکتے ہیں۔

پاکستانی مندوب نے اس نازک مرحلے پر مکالمے اور سفارت کاری کو آگے بڑھنے کا واحد مؤثر راستہ قرار دیا اور تمام فریقین پر زور دیا کہ وہ تحمل کا مظاہرہ کریں، کشیدگی میں کمی لائیں اور پُرامن بقائے باہمی کو فروغ دیں۔