پاکستان سے شکست کا خوف؟ بھارت نے دفاعی ٹیکنالوجی کی خریداری تیز کردی

عالمی جریدے دی اکنامسٹ نے اپنی رپورٹ میں انکشاف کیا ہے کہ 2025 میں تقریباً 7.6 ارب ڈالر کے حجم سے شروع ہونے والا بھارت کا دفاعی ٹیکنالوجی بازار پانچ سال کے دوران تیز رفتار سے بڑھ کر 2030 تک 19 ارب ڈالر تک پہنچنے کی توقع کی جا رہی ہے۔  یہ ترقیاتی رفتار سالانہ تقریباً 20 فیصد CAGRکی شرح سے ہوگی۔

لندن کے معتبر جریدے دی اکنامسٹ کے مطابق بھارت کی جنگی ٹیکنالوجی کی صنعت حالیہ برسوں میں غیر معمولی ترقی کر رہی ہے، اور پاکستان کے ساتھ حالیہ فضائی و میزائل تصادم نے اس صنعت کو نئی رفتار، سرمایہ کاری اور تحقیق کے مواقع فراہم کیے ہیں۔

چار روزہ کشیدگی کے دوران بھارتی فضائی دفاعی نظام کم قیمت ڈرون حملوں کے دباؤ میں رہا، جس کے نتیجے میں مہنگے انٹرسیپٹر میزائل استعمال کرنے پڑے۔ اگرچہ جدید میزائل مؤثر رہے، مگر فضائی دفاع جعلی اہداف کی وجہ سے الجھ گیا، جس نے بھارت کو فوری اقدامات کرنے پر مجبور کیا۔ اس کے بعد بھارت نے پانچ ارب ڈالر کی ایمرجنسی جنگی خریداری کی، جس میں میزائل اور گولہ بارود کے ذخائر کی فوری بحالی شامل تھی۔

بنگلور کے اسٹارٹ اپس نے جنگ کے دوران اہم خدمات فراہم کیں اور اس شعبے میں سرمایہ کاروں کی توجہ کا مرکز بن گئے۔ ڈرون ٹیکنالوجی، الیکٹرانک وارفیئر اور مصنوعی ذہانت کے شعبوں میں سرگرم اسٹارٹ اپس نمایاں ہو کر ابھرے ہیں، جبکہ حکومتی اسکیمیں اور دفاعی خود کفالت کے منصوبے اس ترقی کو مزید مضبوط کر رہے ہیں۔

رپورٹ میں یہ بھی بتایا گیا ہے کہ سستے ڈرونز کے مقابلے میں مہنگے انٹرسیپٹر استعمال کرنے کی ضرورت سے لاگت میں واضح اضافہ ہوا اور بھارت کی دفاعی تیاریوں پر نئی روشنی ڈالی گئی۔