نادرا میں فَیس بائیومیٹرک تصدیقی سہولت کا آغاز

نادرا نے چہرے کی شناخت پر مبنی بائیومیٹرک تصدیق کی نئی سہولت متعارف کر دی ہے۔ اس اقدام کا مقصد ان شہریوں کی مشکلات دور کرنا ہے جو عمر رسیدگی یا طبی مسائل کی وجہ سے فنگر پرنٹس کی تصدیق نہیں کروا پاتے۔

نادرا کے مطابق وزیراعظم اور وزیر داخلہ کی ہدایات پر قومی شناختی قوانین
میں تبدیلی کی گئی ہے تاکہ بائیومیٹرک کی تعریف کو وسیع کیا جا سکے۔ اب شہری نہ صرف فنگر پرنٹس بلکہ چہرے کی شناخت کے ذریعے بھی اپنی تصدیق کروا سکیں گے۔

یہ سہولت پاک آئی ڈی موبائل ایپ پر بھی فراہم کی جا رہی ہے، جبکہ 20 جنوری سے نادرا مراکز پر چہرے کی شناخت پر مبنی بائیومیٹرک سرٹیفکیٹ جاری کیا جائے گا۔

شہری معمولی فیس کے عوض یہ سرٹیفکیٹ حاصل کر سکیں گے۔ اس سرٹیفکیٹ پر تصویر، شناختی کارڈ نمبر، نام، ولدیت، منفرد ٹریکنگ آئی ڈی اور کیو آر کوڈ درج ہوگا اور یہ سات دن تک قابلِ استعمال رہے گا۔

نادرا کا کہنا ہے کہ اس نظام کے نفاذ کے لیے تمام انتظامات مکمل ہیں اور متعلقہ اداروں کو بھی اقدامات کی درخواست کی گئی ہے۔ 20 جنوری کے بعد اگر کسی شہری کو سہولت کی دستیابی میں مسئلہ پیش آئے تو وہ متعلقہ محکمے سے رجوع کر سکتا ہے۔
مستقبل میں ڈیجیٹل آئی ڈی کے اجرا کے بعد یہ سہولت پاک آئی ڈی موبائل ایپ پر بھی دستیاب ہوگی۔