ڈارک چاکلیٹ نقصان دہ نہیں فائدہ مند ہے، مگر وہ کیسے؟
چاکلیٹ کو دانتوں کی خرابی، وزن بڑھنے اور جِلد کے مسائل کا ذمہ دار سمجھا جاتا رہا ہے۔ مگر سائنسی تحقیق نے آہستہ آہستہ یہ تصور بدل دیا ہے۔ حقیقت یہ ہے کہ خاص طور پر ڈارک چاکلیٹ نہ صرف بے ضرر ہے بلکہ کئی حوالوں سے صحت کے لیے فائدہ مند بھی ثابت ہو سکتی ہے۔ شرط صرف یہ ہے کہ اسے درست مقدار اور درست قسم میں استعمال کیا جائے۔
ذیل میں چاکلیٹ کے سات ایسے حیران کن فوائد پیش کیے جا رہے ہیں جو سائنس نے ثابت کیے ہیں
دل کی محافظ
The BMJ میں شائع تحقیق کے مطابق باقاعدہ چاکلیٹ کھانے والوں میں دل کی بیماریوں کا خطرہ 37 فیصد تک کم ہو جاتا ہے۔ کوکو میں موجود فلیوینولز خون کی نالیوں کو صحت مند رکھتے اور سوزش کم کرتے ہیں۔
دماغی طاقت میں اضافہ
Nature Neuroscience کی ایک تحقیق بتاتی ہے کہ کوکو دماغ کے اُس حصے میں خون کی روانی بڑھاتا ہے جو یادداشت اور سیکھنے سے جڑا ہے۔ یوں ڈارک چاکلیٹ ذہانت کو تیز رکھنے میں مددگار ہے۔
موڈ کو خوشگوار بنائے
چاکلیٹ دماغ میں سیروٹونن اور ڈوپامین جیسے "خوشی کے ہارمونز" کو بڑھاتی ہے۔ Journal of Psychopharmacology کے مطابق یہ ذہنی دباؤ کم کرنے اور موڈ بہتر بنانے کا قدرتی نسخہ ہے۔
وزن پر قابو
Archives of Internal Medicine کی تحقیق کے مطابق محدود مقدار میں چاکلیٹ کھانے والوں کا BMI نسبتاً کم پایا گیا۔ وجہ یہ ہے کہ چاکلیٹ میٹابولزم کو بہتر اور بھوک پر قابو پانے میں مدد دیتی ہے۔
جِلد کے لیے مفید
The Journal of Nutrition کے مطابق کوکو جِلد میں نمی برقرار رکھنے اور سورج کی نقصان دہ شعاعوں سے بچاؤ میں مددگار ہے۔ نتیجہ: نرم، صحت مند اور تروتازہ جِلد۔
اسٹریس ہارمون میں کمی
2009 کی ایک تحقیق کے مطابق روزانہ ڈارک چاکلیٹ کھانے سے کورٹیسول (اسٹریس ہارمون) کی سطح کم ہوتی ہے، جس سے ذہنی دباؤ گھٹتا ہے۔
غصہ اور چڑچڑاپن کم کرے
Frontiers in Psychology کے مطابق چاکلیٹ ڈوپامین کے اخراج کو بڑھاتی ہے، جو جذباتی توازن قائم رکھنے میں اہم ہے۔ یوں یہ غصہ اور بے قابو رویے کو کم کرنے میں مددگار ہے۔