چیف آف ڈفینس فورسز کی تعیناتی کا عمل شروع

وزیر دفاع خواجہ محمد آصف نے کہا ہے کہ چیف آف ڈیفنس فورسز یا سی ڈی ایف کے نوٹیفیکیشن سے متعلق غیر ضروری اور غیر ذمہ دارانہ قیاس آرائیاں کی جا رہی ہیں، تاہم نوٹیفیکیشن جاری کرنے سے متعلق ’عمل شروع ہو چکا ہے۔ وزیر اعظم جلد وطن واپس آ رہے ہیں۔ نئے ’سی ڈی ایف کے بارے میں نوٹیفیکیشن مناسب وقت پر کر دیا جائے گا۔ اس بارے میں کسی قیاس آرائی کی کوئی گنجائش نہیں ہے۔ خیال رہے کہ جنرل ساحر شمشاد مرزا فوج کے آخری چیئرمین جوائنٹ چیفس آف سٹاف کمیٹی ہیں کیونکہ 27ویں آئینی ترمیم کے تحت اب یہ عہدہ ختم کر دیا گیا ہے۔ اس ترمیم میں ایک نیا عہدہ چیف آف ڈیفینس فورسز کا متعارف کرا گیا ہے جس پر بری فوج کے سربراہ ہی فائز ہوں گے۔ جنرل ساحر شمشاد مرزا 27 نومبر سے چیئرمین جوائنٹ چیفس آف سٹاف کمیٹی کے عہدے سے سبکدوش ہوئے تھے۔