عمران خان اور بے نظیر بھٹو کی دوستی کا دلچسپ قصہ

پاکستان تحریک انصاف کے بانی و سابق وزیراعظم عمران خان ایک پرانے انٹرویو میں صحافی ہارون رشید سے گفتگو کے دوران سابق وزیراعظم شہید محترمہ بے نظیر بھٹو کے ساتھ لندن میں گزرے دنوں کی یادیں تازہ کیں۔ عمران خان نے بتایا کہ انگلینڈ میں قیام کے دوران انہیں اکثر بھوک لگتی رہتی تھی۔ پاکستان میں وہ دن بھر کئی مرتبہ کھانے کے عادی تھے، لیکن لندن میں ڈائننگ روم سے کھانا کھا کر نکلتے ہی دوبارہ بھوک محسوس ہوتی تھی۔ انہوں نے کہا کہ انگلینڈ کی سردی میں یہ کیفیت مزید بڑھ جاتی تھی اور یوں لگتا تھا جیسے ہر وقت بھوک ساتھ لگی ہوئی ہے۔ سال 2022کو دیے گئے اس انٹرویو میں عمران خان نے مزید بتایا کہ اسی زمانے میں بے نظیر بھٹو بھی لندن کے ایک دوسرے کالج میں زیرِ تعلیم تھیں اور اتوار کے روز اپنے اوپن ہاؤس سیشن میں طلبہ کو مدعو کرتی تھیں کیونکہ وہ یونین کے انتخابات میں حصہ لے رہی تھیں۔ بانی پی ٹی آئی کے بقول وہ اور ان کا بھارتی دوست وکرم مہتا اکثر ان سیشنز میں شرکت کرتے تھے، لیکن ان سیشنز میں شرکت کی اصل وجہ بھوک ہوتی تھی۔ وہ دونوں بے نظیر کے کالج صرف اس لیے جاتے کہ وہاں انہیں سینڈوچ مل جاتے۔ عمران خان نے بے نظیر کے ساتھ اپنی دوستی کا ذکر کرتے ہوئے کہا کہ بےنظیر سے میری اچھی دوستی تھی، وہ لندن میں بڑی شان و شوکت سے رہتی تھیں اور اپنے مہمانوں کے لیے سینڈوچ خود کیٹر کرتی تھیں۔ عمران خان نے ان یادوں کو دہراتے ہوئے کہا تھا کہ یہ دور ان کے لیے خوشگوار اور یادگار تھا۔