کراچی شہر بڑی تباہی سے بچ گیا، گرفتار دہشتگردوں کی نشاندہی پر 4ٹن دھماکا خیز مواد برآمد

کراچی ایک بڑی تباہی سے بچ گیا، سکیورٹی اداروں نے شہر میں دہشت گردی کا ایک بڑا منصوبہ بروقت کارروائی کرتے ہوئے ناکام بنا دیا۔

سکیورٹی حکام کے مطابق بلدیہ رئیس گوٹھ میں خفیہ اطلاع پر کی گئی کارروائی کے دوران چار ٹن سے زائد دھماکا خیز مواد برآمد کر لیا گیا۔

کارروائی کے دوران ایک منی ٹرک اور متعدد گیس سلینڈرز بھی تحویل میں لے لیے گئے ہیں۔

حکام کا کہنا ہے کہ یہ کارروائی زیرِ حراست دہشت گردوں کی نشاندہی پر کی گئی، جنہوں نے انکشاف کیا تھا کہ منی ٹرک میں بھرا گیا دھماکا خیز مواد آئی آئی چندریگر روڈ پر دہشت گردی کی بڑی کارروائی کے لیے استعمال کیا جانا تھا۔

سکیورٹی حکام کے مطابق برآمد ہونے والا بارودی مواد ڈرموں میں بھر کر شہر منتقل کیا گیا تھا۔  مجموعی طور پر 60 ڈرم اور 5 گیس سلینڈرز قبضے میں لیے گئے، جنہیں بم ڈسپوزل اسکواڈ نے موقع پر ہی ناکارہ بنا دیا۔

سکیورٹی اداروں کا کہنا ہے کہ بروقت کارروائی سے بڑے جانی و مالی نقصان سے بچاؤ ممکن ہو سکا۔