سالِ نو کا جشن، سندھ میں کتنے لوگ ہوائی فائرنگ کی زد میں آگئے؟

نئے سال کے جشن کے موقع پر سندھ کے دارالحکومت کراچی کے مختلف علاقوں میں ہوائی فائرنگ کے واقعات پیش آئے، جس کے نتیجے میں 25 افراد زخمی ہو گئے۔ پولیس کے مطابق زخمیوں میں بچیاں اور خواتین بھی شامل ہیں۔

پولیس کا کہنا ہے کہ شہر کے مختلف علاقوں میں کارروائیاں کرتے ہوئے ہوائی فائرنگ میں ملوث 56 افراد کو گرفتار کر لیا گیا۔

ریسکیو ذرائع کے مطابق کورنگی، گولیمار، فائیو اسٹار، نیو سبزی منڈی سمیت متعدد علاقوں میں فائرنگ کے واقعات رپورٹ ہوئے، جن میں شہری زخمی ہوئے۔

سندھ کے دیگر شہروں میں بھی اسی طرح کے واقعات سامنے آئے۔ حیدرآباد میں سال نو کے موقع پر ہوائی فائرنگ سے 4 افراد جبکہ نواب شاہ میں 2 افراد زخمی ہوئے۔

واضح رہے کہ نئے سال کے پیشِ نظر محکمہ داخلہ سندھ نے کراچی میں اسلحے کی نمائش اور ہوائی فائرنگ پر پابندی عائد کرتے ہوئے باقاعدہ نوٹیفکیشن جاری کیا تھا۔ اس کے ساتھ ساتھ پولیس نے ہوائی فائرنگ کرنے والوں کی نشاندہی کے لیے ڈرون کیمروں کے استعمال کا بھی فیصلہ کیا تھا۔

پولیس حکام کے مطابق لیاقت آباد، شریف آباد، عزیز آباد، ناظم آباد اور دیگر حساس علاقوں میں ڈرون کیمرے اڑائے گئے۔ ان کیمروں کے ذریعے ہوائی فائرنگ میں ملوث افراد کی ویڈیوز ریکارڈ کر کے ان کے خلاف مقدمات درج کیے جائیں گے۔

پولیس کا مزید کہنا ہے کہ 16 سے زائد تھانوں کو ڈرون کیمرے فراہم کیے جا چکے ہیں تاکہ اس غیر قانونی عمل کے خلاف مؤثر کارروائی کی جا سکے۔