عرب اسپرنگ کے 15سال مکمل، معزول صدور کے انقلاب کی کہانی اور تقدیر

روم / دوحہ:شمالی افریقہ اور مشرق وسطیٰ میں 2010ء میں شروع ہونے والی عرب اسپرنگ نے دنیا کے سیاسی منظرنامے کو یکسر بدل کر رکھ دیا۔

17دسمبر کو تیونس سے شروع ہونے والی عرب اسپرنگ کے دوران لاکھوں شہریوں کی احتجاجی تحریکوں نے کئی دہائیوں سے طاقت میں موجود حکمرانوں کی حکومتیں ہلا کر رکھ دیا، بعض اقتدار چھوڑ گئے، کچھ ہلاک ہوئے اور بعض کو دیگر ممالک میں پناہ لینے پر مجبور ہونا پڑا۔

تونس میں زین العابدین بن علی وہ پہلا صدر تھے جن کی حکومت اس عوامی تحریک کے نتیجے میں دسمبر 2010 میں ختم ہوئی۔

بن علی سعودی عرب پناہ گزین ہوئے اور وہاں 2019 میں زندگی کی آخری سانس لی، برطرفی نے عرب اسپرنگ کے آغاز کی علامت بن کر دنیا بھر میں شہرت حاصل کی۔

مصر کے طویل عرصے تک اقتدار میں رہنے والے صدر حسنی مبارک بھی 2011 میں شدید عوامی احتجاج کے دباؤ کے نتیجے میں عہدے سے مستعفی ہو گئے،بعد ازاں وہ مختلف مقدمات کا سامنا کرتے رہے اور 2020 میں قاہرہ میں انتقال کر گئے۔

اسی طرح یمن میں علی عبدالله صالح نے بھی 2011 میں اقتدار کی کرسی کو چھوڑ دیا، بعد میں حوثی باغیوں کے حملے میں 2017 میں جان بحق ہو گئے۔

لیبیا کے معمر قذافی بھی عرب اسپرنگ کے دوران عوامی بغاوت میں ہلاک ہوگئے، ان کا اقتدار کا خاتمہ بے رحمانہ مظاہروں اور عسکری مداخلت کی ایک مثال بن گیا،ان کے ساتھ کئی دیگر حکمرانوں کی قسمت بھی یکسر بدل گئی۔

شام کے صدر بشار الاسد عرب اسپرنگ کے دوران اپنی حکومت قائم رکھنے میں کامیاب رہے، لیکن دسمبر 2024 میں بڑھتے ہوئے داخلی دباؤ اور مخالفت کے نتیجے میں ان کو روس کے شہر ماسکو میں پناہ لینا پڑی، جہاں وہ اپنے خاندان کے ساتھ مقیم ہیں۔

ماہرین کے مطابق عرب اسپرنگ نے نہ صرف عوامی غم و غصے کو طاقت میں بدلنے کی ایک مثال قائم کی بلکہ کئی ملکوں میں سیاسی نظام کی بنیادیں بھی ہلا دیں۔ انقلاب نے ثابت کر دیا کہ عوامی تحریکیں صرف وقتی احتجاج نہیں بلکہ ملکوں کی تقدیر بدلنے کی طاقت رکھتی ہیں۔ کچھ صدور کی زندگی مکمل طور پر بدل گئی، کچھ کو موت کا سامنا کرنا پڑا اور کچھ پناہ گزین بن کر اپنی زندگی بچانے پر مجبور ہوئے۔

آج عرب اسپرنگ کے 15 سال بعد بھی مذکورہ خطہ سیاسی اور سماجی تبدیلیوں کے پیچیدہ مراحل سے گزر رہا ہے، جہاں عوامی امنگیں، حکمرانوں کی حکمت عملی اور عالمی اثرات ایک پیچیدہ جال بچھائے ہوئے ہیں۔

عرب اسپرنگ یاد دلاتی ہے کہ عوامی طاقت، تبدیلی کے عمل میں سب سے بڑی قوت ہو سکتی ہے۔