پوپ لیو کا استنبول کی تاریخی نیلی مسجد کا دورہ

پوپ لیو چہار دہم نے ترکی کے دورے کے تیسرے دن استنبول کی مشہور و تاریخی نیلی مسجد کا دورہ کیا، جو کیتھولک چرچ کے سربراہ کی حیثیت سے کسی مسلم عبادت گاہ پہلا دورہ ہے۔ امریکا سے تعلق رکھنے والے پہلے پوپ نے مسجد میں داخل ہونے سے پہلے جوتے اتارے اور پھر اندر داخل ہوتے وقت احتراماً سر جھکایا۔ انہیں امام مسجد اور استنبول کے مفتی نے مسجد کے وسیع و عریض احاطے کا دورہ کرایا، جو بیک وقت 10 ہزار نمازیوں کی گنجائش رکھتی ہے۔ پوپ لیو نے تقریباً 20 منٹ کے دورے میں مسکراہٹ کے ساتھ رہنمائی قبول کی اور مسجد کے مؤذن کے ساتھ بھی خوشگوار انداز میں گفتگو کی۔ مؤذن عسکن تونچا نے صحافیوں کو بتایا کہ پوپ مسجد کو دیکھنا چاہتے تھے، اس کا ماحول محسوس کرنا چاہتے تھے، اور وہ یہاں آکر بہت خوش ہوئے۔ تونچا نے مزید کہا کہ انہوں نے پوپ سے پوچھا کہ کیا وہ چند لمحے کے لیے دعا کرنا چاہیں گے، مگر پوپ نے جواب دیا کہ وہ صرف مسجد کا دورہ کرنا چاہتے ہیں۔ دورے کے فوراً بعد ویٹیکن نے ایک بیان میں کہا کہ پوپ نے مسجد کا یہ دورہ ’’غور و فکر اور خاموشی کے ساتھ، اس مقام اور وہاں عبادت کرنے والوں کے عقیدے کے لیے گہرے احترام‘‘ کے طور پر کیا۔ اپنے پیش روؤں کے برعکس پوپ لیو نے نزدیکی آیا صوفیہ کا دورہ نہیں کیا، یہ چھٹی صدی کی وہ عظیم عبادت گاہ ہے جسے بازنطینی دور میں گرجا گھر، عثمانی دور میں مسجد اور جدید ترکی میں میوزیم میں تبدیل کر دیا گیا تھا۔