امریکی حملے میں فوجی افسران سمیت وینزویلہ کے کتنے 40 شہری ہلاک ہوئے؟

امریکی معروف جریدے کے مطابق وینزویلا کے ایک سینئر عہدیدار نے نام ظاہر نہ کرنے کی شرط پر بتایا کہ ان حملوں میں شہریوں کے ساتھ ساتھ فوجی اہلکار بھی مارے گئے۔  عہدیدار کے مطابق یہ کارروائیاں ہفتے کی علی الصبح کی گئیں۔

دوسری جانب امریکی حکام نے ہلاکتوں سے متعلق کسی قسم کی تصدیق یا تردید نہیں کی، تاہم امریکی صدر ڈونلڈ ٹرمپ نے میڈیا سے گفتگو کرتے ہوئے کہا کہ اس کارروائی میں کوئی امریکی فوجی ہلاک نہیں ہوا، البتہ متعدد امریکی اہلکار زخمی ہوئے ہیں۔

ادھر امریکی جوائنٹ چیفس آف اسٹاف کے چیئرمین جنرل ڈین کین نے ایک پریس کانفرنس میں بتایا کہ وینزویلا کے صدر نکولس مادورو اور ان کی اہلیہ کو نکالنے کے لیے امریکی ہیلی کاپٹروں نے کارروائی کی۔ ان کے مطابق اس دوران ایک ہیلی کاپٹر کو نشانہ بنایا گیا، تاہم وہ پرواز کے قابل رہا اور تمام امریکی طیارے بحفاظت واپس پہنچ گئے۔

واضح رہے کہ ایک روز قبل امریکی فوج نے وینزویلا کے دارالحکومت سمیت مختلف مقامات پر حملے کیے تھے، جن کے بعد دعویٰ کیا گیا کہ صدر نکولس مادورو اور ان کی اہلیہ کو گرفتار کر کے نیویارک منتقل کر دیا گیا ہے۔

اس حوالے سے روسی میڈیا نے بھی دعویٰ کیا تھا کہ امریکی حملوں میں وینزویلا کے دفاعی ہیڈکوارٹرز کو نشانہ بنایا گیا جبکہ صدر مادورو صدارتی محل چھوڑ کر روانہ ہو گئے تھے۔