لیبیا کے فوجی سربراہ کے کا طیارہ کیسے حادثے کا شکار ہوا؟ وجوہات سامنے آگئیں

لیبیا کے مسلح افواج کے سربراہ جنرل محمد علی احمد الحداد کے طیارے کے حادثے سے متعلق اہم پیش رفت سامنے آئی ہے،جس کے پیش نظر ترکی کے حکام نے حادثے کا بلیک باکس اور کاک پٹ وائس ریکارڈر برآمد کر لیا ہے۔

ترک حکام کے مطابق فالکن 50 نجی طیارہ منگل کو انقرہ سے طرابلس روانہ ہوا، تاہم چند منٹ بعد طیارے کے بجلی کے نظام میں خرابی پیدا ہو گئی۔

ایمرجنسی لینڈنگ کی درخواست کے کچھ دیر بعد طیارے سے رابطہ منقطع ہو گیا، بعد ازاں طیارے کا ملبہ انقرہ کے قریب حیمانہ ضلع میں ملا۔

ترکی کے وزیر داخلہ علی یرلی کایا نے بتایا کہ فلائٹ ڈیٹا ریکارڈر اور وائس ریکارڈر برآمد کر لیے گئے ہیں اور ان کی جانچ شروع کر دی گئی ہے۔

ترک وزیر ٹرانسپورٹ کے مطابق حادثے کی وجوہات جانچنے کے لیے بلیک باکس کا تجزیہ کسی غیر جانبدار ملک میں کیا جائے گا اور نتائج مکمل شفافیت کے ساتھ عالمی برادری کے سامنے پیش کیے جائیں گے۔