سڈنی واقعہ: حملہ آور ساجد اکرم بھارتی نکلا، بھارتی پاسپورٹ پر فلپائن جانے کا انکشاف

آسٹریلیا کے شہر سڈنی کے مشہور بونڈائی ساحل پر یہودی کمیونٹی کی تقریب پر ہونے والے دہشت گردانہ حملے کو دو روز گزر چکے ہیں، مگر آسٹریلوی حکام اب تک یہ واضح نہیں کر سکے کہ حملہ آور باپ اور بیٹے کا تعلق کس ملک سے تھا۔

پولیس نے حملہ آوروں کی شناخت 50 سالہ ساجد اکرم اور ان کے 24 سالہ بیٹے نوید اکرم کے طور پر کی ہے۔ پولیس کی جوابی کارروائی میں ساجد موقع پر ہی مارا گیا جبکہ نوید کو زخمی حالت میں گرفتار کیا گیا، جس کی حالت اب بھی تشویشناک بتائی جا رہی ہے۔

حملے کے فوراً بعد ہی ساجد اور نوید اکرم کی قومیت پر بحث شروع ہو گئی تھی۔ منگل کو فلپائن کے دارالحکومت منیلا میں حکام نے بی بی سی کو بتایا کہ ساجد اکرم نے حال ہی میں انڈین پاسپورٹ پر فلپائن کا سفر کیا تھا، جبکہ ان کے بیٹے نوید نے آسٹریلوی پاسپورٹ استعمال کیا۔

نیو ساؤتھ ویلز کے پولیس کمشنر میل لیون نے پریس کانفرنس میں تصدیق کی کہ دونوں افراد نے فلپائن کا سفر کیا تھا۔ انہوں نے کہا کہ یہ تحقیقات جاری ہیں کہ اس دورے کا مقصد کیا تھا اور وہاں کن مقامات پر گئے۔

فلپائنی حکام کے مطابق دونوں یکم نومبر 2025 کو فلپائن پہنچے اور 28 نومبر کو واپس روانہ ہوئے۔

فلپائن امیگریشن کی ترجمان ڈانا سنڈووال نے بتایا کہ ساجد نے انڈین پاسپورٹ اور نوید نے آسٹریلوی پاسپورٹ استعمال کیا۔

دونوں نے اپنی حتمی منزل ڈاواو شہر بتائی، جو جنوبی جزیرے منڈانو پر واقع ہے۔ اس علاقے کے بعض حصوں میں اسلامی شدت پسندوں کی موجودگی کی اطلاعات رہی ہیں۔

آسٹریلوی ٹی وی اے بی سی نیوز نے سکیورٹی ذرائع کے حوالے سے دعویٰ کیا کہ ساجد اور نوید اکرم فلپائن میں عسکری انداز کی تربیت لینے گئے تھے۔ تاہم فلپائن کی فوج نے کہا ہے کہ وہ فوری طور پر اس دعوے کی تصدیق نہیں کر سکتے۔

آسٹریلیا کے وزیراعظم سے ایک پریس کانفرنس میں سوال کیا گیا کہ کیا وہ حملہ آوروں کی قومیت کے بارے میں ابہام دور کر سکتے ہیں؟۔ وزیراعظم نے جواب دیا کہ یہ معاملہ تفتیش کا حصہ ہے اور فی الحال کوئی حتمی بیان دینا ممکن نہیں۔

تاہم گزشتہ روز خبر سامنے آئی تھی کہ آسٹریلوی انٹیلی جنس ایجنسیز نے اس واقعے پر بھارتی حکومت سے باضابطہ رابطہ کیا ہے، بھارتی میڈیا کا کہنا ہے کہ آسٹریلوی انٹیلی جنس اداروں نے دہشتگردی میں ملوث عناصر کے حوالے سے معلومات اور پوچھ گچھ کے لیے بھارتی حکام سے رابطہ کیا ہے تاکہ واقعے کے پس منظر اور ممکنہ روابط کا تعین کیا جا سکے۔

یاد رہے کہ سڈنی دہشتگردی واقعے میں ملوث ایک دہشتگرد کے قریبی دوست نے بیان دیا تھا کہ نوید کا تعلق بھارت سے ہے۔ دوست کے مطابق دہشتگرد نوید کے والد بھارتی جبکہ اس کی والدہ اطالوی ہیں۔