مذکرات سے ہی حل نکلے گا: بیریسٹر گوہر کی ہم خیال جماعتوں کو قریب لانے کی تجویز

اسلام آباد: چیئرمین پاکستان تحریکِ انصاف بیرسٹر گوہر نے موجودہ سیاسی صورتحال کے پیشِ نظر ہم خیال سیاسی جماعتوں کے درمیان رابطے مضبوط بنانے کے لیے ایک کمیٹی قائم کرنے کی تجویز دے دی ہے۔

اپنے بیان میں بیرسٹر گوہر کا کہنا تھا کہ ملک اور فوج ہم سب کی ہے، ہم ماضی میں بھی ساتھ رہے ہیں اور مستقبل میں بھی ساتھ رہیں گے۔

انہوں نے زور دیا کہ موجودہ حالات میں اختلافات کم کرنے اور بات چیت کے ذریعے راستہ نکالنے کی ضرورت ہے، ہاتھ ملانے سے ہی راستہ بنتا ہے اور گفتگو سے ہی مسائل کا حل نکلتا ہے، اس لیے وقت آ گیا ہے کہ جامع مذاکرات کیے جائیں۔

دوسری جانب وزیراعلیٰ خیبرپختونخوا سہیل آفریدی نے وفاقی پالیسیوں پر تنقید کرتے ہوئے کہا کہ ملک کے ایک صوبے کو وسائل دیے جا رہے ہیں جبکہ خیبرپختونخوا کو اس کے جائز حق سے محروم رکھا جا رہا ہے۔

 انہوں نے مطالبہ کیا کہ وفاق کے ذمے صوبے کے واجب الادا فنڈز فوری طور پر جاری کیے جائیں،آئی ایم ایف کی کرپشن سے متعلق رپورٹ پر کوئی سنجیدہ بات نہیں ہو رہی، جو تشویشناک ہے۔

پی ٹی آئی کے سینئر رہنما اسد قیصر نے کہا کہ ملک میں جمہوری اقدار کو بری طرح نقصان پہنچایا گیا ہے۔ ان کے مطابق صورتحال اس نہج پر پہنچ چکی ہے کہ اپوزیشن رہنماؤں کے لیے پنجاب میں رہائش تک مشکل بنا دی گئی ہے۔