بھارت میں چلتی گاڑی میں خاتون کیساتھ اجتماعی زیادتی، نجی کمپنی کے CEOسمیت 3ملزمان گرفتار

بھارتی ریاست راجستھان کے شہر اودے پور میں پولیس نے ایک نجی آئی ٹی کمپنی کے سی ای او، خاتون ایگزیکٹو ہیڈ اور اس کے شوہر کو ایک خاتون ملازمہ کے مبینہ اجتماعی زیادتی کے الزام میں گرفتار کر لیا۔

ضلعی پولیس سربراہ یوگیش گوئل کے مطابق واقعہ چلتی گاڑی میں پیش آیا۔ متاثرہ خاتون کی شکایت پر مقدمہ درج کیا گیا، جس کے بعد اس کا بیان قلمبند کیا گیا اور طبی معائنہ بھی کرایا گیا۔

پولیس کے مطابق میڈیکل رپورٹ میں متاثرہ خاتون کے جسم پر زخموں کے نشانات ملے ہیں جو ابتدائی طور پر اجتماعی زیادتی کے دعوے کی تائید کرتے ہیں۔

پولیس نے بتایا کہ تفتیش کے دوران گاڑی میں نصب ڈیش کیم کی فوٹیج بھی حاصل کر لی گئی ہے، جس میں آڈیو اور ویڈیو ریکارڈنگ موجود ہے اور اسے اہم ثبوت سمجھا جا رہا ہے۔

ابتدائی شواہد کی بنیاد پر کمپنی کے سی ای او جیتیش سسودیا، ایگزیکٹو ہیڈ شلپا سیروہی اور اس کے شوہر گورو کو گرفتار کیا گیا۔

ایف آئی آر کے مطابق یہ واقعہ 20 دسمبر کو شوبھاگ پورہ کے ایک ہوٹل میں کمپنی کے سی ای او کی جانب سے منعقدہ سالگرہ اور نئے سال کی تقریب کے بعد پیش آیا۔