سابق وزیر اعظم بنگلادیش خالدہ ضیا کی حالت تشویشناک

خالدہ ضیاء کی حالت تشویشناک،صحتیابی کی اپیل ڈھاکا: بنگلہ دیش کی سابق وزیراعظم اور بی این پی کی چیئرپرسن خالدہ ضیاء کی طبیعت انتہائی ناساز ہے اور وہ گزشتہ کئی دنوں سے ڈھاکا کے ایورکئیر اسپتال کے آئی سی یو میں زیرِ علاج ہیں۔ ان کے اہلِ خانہ اور پارٹی رہنماؤں نے عوام سے ان کی جلد صحت یابی کے لیے دعا کرنے کی اپیل کی ہے۔ خالدہ ضیاء کے ذاتی معالج ڈاکٹر اے زیڈ ایم زاہد حسین کے مطابق 80 سالہ رہنما کو 23 نومبر کو پھیپھڑوں کے انفیکشن کی علامات کے باعث اسپتال منتقل کیا گیا تھا، اور اگرچہ وہ علاج کا جزوی طور پر مثبت جواب دے رہی ہیں، مگر ان کی حالت گزشتہ تین روز سے تقریباً یکساں ہے۔ ڈاکٹر کے بقول، ’’وہ علاج کو رسپانڈ کر رہی ہیں، لیکن مسلسل دعا اور طبی نگہداشت کی ضرورت ہے۔‘‘ اس سے قبل بی این پی کے سیکریٹری جنرل میرزا فخرالاسلام عالمگیر نے صحافیوں کو بتایا تھا کہ خالدہ ضیاء کی حالت ’’انتہائی تشویشناک‘‘ ہے اور ڈاکٹرز ان کی صحت پر لمحہ بہ لمحہ نظر رکھے ہوئے ہیں۔ سابق وزیراعظم کو دل کے عارضے، جگر و گردوں کی خرابی، ذیابطیس، پھیپھڑوں کے مسائل، گٹھیا اور بینائی سے متعلق بیماریوں سمیت متعدد پیچیدہ امراض لاحق ہیں۔ ان کے دل میں پہلے سے نصب مستقل پیس میکر اور ماضی میں کی گئی اسٹنٹنگ بھی ان کی مجموعی صحت کو مزید حساس بنا رہی ہے۔ دوسری جانب بی این پی کے وائس چیئرمین احمد اعظم خان نے بتایا کہ اگر ان کی طبی حالت میں معمولی بہتری آئی تو انہیں بیرونِ ملک علاج کے لیے ایئر ایمبولینس کے ذریعے منتقل کرنے کی تمام تیاریاں مکمل ہیں۔