بگرام ایئر بیس پر جنگی ساز و سامان کی تیاری کا دعویٰ، امریکی جریدے نے پول کھول دیا

امریکی جردیدے واشنگٹن پوسٹ نے طالبان رجیم کے بگرام ایئر بیس پر جنگی طیارے اور بکتر بند گاڑیاں تیار کرنے کے دعوؤں کا پردہ چاک کردیا۔

رپورٹ میں بتایا گیا ہے کہ سیٹلائٹ تصاویر اور دیگر شواہد واضح کرتے ہیں کہ طالبان صرف ناکارہ طیاروں اور پرانی بکتر بند گاڑیوں کو رنگ و روغن کر کے رن وے پر کھڑا کر رہے ہیں،جسے سوشل میڈیا پر پروپیگنڈا کے طور پر پیش کیا جا رہا ہے۔

امریکی جریدے نے رپورٹ میں بتایا گیا ہے کہ طالبان نے جنگی مشقوں،طیاروں کی مبینہ مرمت اور عسکری پریڈز کی ویڈیوز جاری کر کے عوام اور بین الاقوامی برادری کو گمراہ کرنے کی کوشش کی۔

رپورٹ کے مطابق امریکہ میں بعض تحقیقاتی اور مفاداتی حلقے بگرام ایئر بیس کی سرگرمیوں پر گہری نظر رکھے ہوئے ہیں،خاص طور پر افغانستان میں چھوڑے گئے امریکی اسلحے اور فوجی سازوسامان کے حوالے سے۔ امریکی صدر ڈونلڈ ٹرمپ بھی بگرام ایئر بیس کی واپسی کا مطالبہ کر چکے ہیں۔

رپورٹ میں مزید کہا گیا ہے کہ طالبان اپنی سیکیورٹی ضروریات کے لیے غیر منظم اور مسلح گروہوں پر انحصار کر رہے ہیں، جو عالمی سطح پر تشویش کا باعث ہے۔ اس سے خطرہ ہے کہ افغانستان میں دہشت گرد گروہوں کو پشت پناہی جاری رہے گی، جو خطے اور عالمی امن کے لیے خطرناک ہو سکتا ہے۔