سارو گنگولی کی اہلیہ آن لائن ہراسانی کا شکار، تھانے پہنچ گئیں

بھارت کے سابق کرکٹ کپتان سارو گنگولی کی اہلیہ اور معروف رقاصہ ڈونا گنگولی نے آن لائن ہراسانی اور نازیبا تبصروں کے خلاف کولکتہ پولیس میں مقدمہ درج کروا دیا۔ بھارتی میڈیا کے مطابق، ڈونا گنگولی نے بتایا کہ کولکتہ فلم فیسٹیول میں حالیہ پرفارمنس کے بعد انہیں سوشل میڈیا پر توہین آمیز کمنٹس اور باڈی شیمنگ کا سامنا کرنا پڑا۔ انہوں نے مقامی تھانے میں شکایت دیتے ہوئے کہا کہ چند صارفین کی جانب سے کیے گئے نازیبا تبصرے نہ صرف ان کی عزتِ نفس کو مجروح کرتے ہیں بلکہ ایک فنکار کے طور پر ان کی ساکھ کو بھی نقصان پہنچا رہے ہیں۔ 49سالہ ڈونا گنگولی نے ایک مخصوص فیس بک پیج کا حوالہ بھی دیا جس پر ان کی پرفارمنس کی تصاویر شیئر کرتے ہوئے گالی گلوچ اور غلیظ الفاظ استعمال کیے گئے، اور وزن کے حوالے سے توہین آمیز ریمارکس بھی کیے گئے۔ اپنے دعوے کے ثبوت کے طور پر انہوں نے اسکرین شاٹس اور موبائل نمبر پولیس کو فراہم کیے۔ کولکتہ پولیس نے نامعلوم افراد کے خلاف مقدمہ درج کر کے تفتیش شروع کر دی ہے اور حکام فراہم کردہ معلومات کی بنیاد پر مشتبہ شخص تک پہنچنے کی کوشش کر رہے ہیں۔