پنجاب میں صرف 6 سالوں میں 5 ہزار سے زائد بچوں اور بچیوں سے زیادتی کا انکشاف

پنجاب میں گزشتہ چھ برسوں کے دوران کم عمر بچوں اور بچیوں کے ساتھ زیادتی کے واقعات کی ایک تشویشناک رپورٹ سامنے آئی ہے۔

اس رپورٹ کے مطابق صوبے میں مجموعی طور پر 5761 کیسز درج کیے گئے، جن میں سے 638 واقعات اجتماعی زیادتی کے تھے۔

اعداد و شمار کے مطابق ان مقدمات میں نامزد 9524 ملزمان میں سے 1073 افراد گرفتار نہیں ہو سکے، جبکہ اجتماعی زیادتی کے کیسز میں شامل 1710 ملزمان میں سے 258 ابھی تک گرفتار نہیں ہوئے۔

رپورٹ میں بتایا گیا ہے کہ بچوں سے زیادتی کے کیسز میں 5756 چالان مکمل کیے جا چکے ہیں، جبکہ اجتماعی زیادتی کے کیسز میں 518 چالان مکمل ہوئے ہیں۔ اس کے علاوہ 334 کیسز زیرِ تفتیش ہیں اور ایک کیس اب تک "ان ٹریس" ہے۔

یہ اعداد و شمار نہ صرف صوبے میں بچوں کے تحفظ کے حوالے سے سنگین صورتحال کو ظاہر کرتے ہیں بلکہ اس بات کی نشاندہی بھی کرتے ہیں کہ انصاف کے عمل میں ابھی کئی خلا موجود ہیں۔