سندھ کابینا: آدم کانفرنس، ادب فیسٹیول اور ساؤتھ ایسٹ ایشیا ریجنل کانفرنس کیلئے فنڈز منظور
کراچی: سندھ کابینا نے آدم کانفرنس اور ادب فیسٹیول کے لیے فنڈز کی منظوری دے دی، جبکہ ساؤتھ ایسٹ ایشیا ریجنل کانفرنس کے انعقاد کے لیے بھی فنڈز منظور کئے گئے۔
وزیر اعلیٰ مراد علی شاہ کی زیر صدارت سندھ کابینا کے اجلاس میں اسلام کوٹ کے علاقے پریم نگر میں خصوصی یتیم خانہ (ایس او ایس) قائم کرنے کے لیے 329 ملین روپے کی منظوری دےدی گئی۔ جبکہ وزیر اعلیٰ سندھ نے گورنمنٹ ڈگری بوائز کالج خانپور، ضلع شکارپور کے لیے 187.8 ملین روپے کی ایس این ای کی منظوری دیدی۔
کابینا اجلاس میں وزیراعلیٰ سندھ نے ملیر میں واٹر سپلائی اسکیم کے لیے 103.9 ملین روپے کی منظوری دیدی۔ جبکہ وزیراعلیٰ سندھ نے کورنگی کازوے سے قبرستان اور پارک کے لیے ایک ریمپ تعمیر کرنے کے لیے 349.2 ملین روپے کی منظوری دیدی۔ وزیر اعلیٰ نے کہا کہ قبرستان اور پارک ریکلیم کی گئی اراضی پر قائم کیے جائیں گے۔
سندھ کابینا کےاجلاس میں وزیراعلیٰ نے 10واں آدم کانفرنس اور ادب فیسٹیول کے لیے 7.5 ملین اور ایس ایم بی فاطمہ جناح گرلز سیکنڈری اسکول صدر کے لیے 94.7 ملین روپے کی منظوری دے دی۔ وزیر اعلیٰ کا کہنا تھا کہ ایس ایم بی فاطمہ جناح گرلز سیکنڈری اسکول کو تمام ضروری اور کمی شدہ سہولیات فراہم کی جائیں گی۔
اس کے علاوہ کابینہ نے سندھ اسمبلی میں ساؤتھ ایسٹ ایشیا ریجنل کانفرنس کے انعقاد کے لیے 200 ملین روپے کی منظوری دے دی۔