کراچی میں ایرانی اسمگل شدہ ہزاروں لیٹر پیٹرول و ڈیزل ضبط، مالیت کتنی؟
کراچی: پاکستان کسٹمز انفورسمنٹ کراچی نے نادرن بائی پاس کے علاقے میں انٹیلیجنس بیسڈ طویل دورانیے کی کارروائی کے دوران ایرانی اسمگل شدہ پیٹرول اور ڈیزل کی بڑی کھیپ برآمد کر کے ضبط کر لی، جس کی مجموعی مالیت ایک کروڑ 65 لاکھ روپے بتائی جا رہی ہے۔
کسٹمز انفورسمنٹ حکام کے مطابق یہ انٹیلیجنس بیسڈ آپریشن دوپہر 2 بجے شروع ہوا جو رات 11 بج کر 30 منٹ تک جاری رہا اور کارروائی کے دوران پیٹرول پمپس کی آڑ میں قائم پانچ ڈمپنگ پوائنٹس پر چھاپے مارے گئے۔
حکام نے بتایا کہ کارروائی کے دوران پیٹرولیم مصنوعات کی نقل و حمل کے لیے خصوصی طور پر ڈیزائن کی گئی ایک مزدا گاڑی بھی ضبط کی گئی، جس میں ایرانی اسمگل شدہ ڈیزل موجود تھا۔ ضبط شدہ پیٹرول اور ڈیزل کو پیمائش کے لیے ڈِپ کے ذریعے ایک گودام منتقل کر دیا گیا۔
حکام کے مطابق پیٹرول پمپس سے 43 ہزار لیٹر ایرانی اسمگل شدہ ڈیزل اور 10 ہزار 139 لیٹر ایرانی پیٹرول برآمد ہوا، جبکہ مزدا گاڑی سے مزید 11 ہزار 439 لیٹر ایرانی ڈیزل ضبط کیا گیا،یوں مجموعی طور پر 64 ہزار 578 لیٹر ایرانی اسمگل شدہ پیٹرول اور ڈیزل قبضے میں لیا گیا۔
کسٹمز حکام کا کہنا ہے کہ کارروائی کے دوران ضبط کی گئی گاڑی کی مالیت تقریباً 2 کروڑ روپے ہے، جبکہ کیس کی مجموعی مالیت 3 کروڑ 65 لاکھ روپے بنتی ہے۔