بھارت میں ایک خاتون نے پانی کی جگہ تیزاب سے کھانا بنا ڈالا، پھر کیا ہوا؟

بھارتی ریاست مغربی بنگال کے ضلع مدنی پور میں ایک حیران کن اور افسوسناک واقعہ پیش آیا ہے، جہاں ایک خاتون نے لاعلمی میں کھانا پکاتے ہوئے پانی کی جگہ تیزاب استعمال کر لیا۔ اس سنگین غلطی کے نتیجے میں خاتون سمیت ان کے اہل خانہ شدید متاثر ہوئے اور فوری طور پر اسپتال منتقل کرنا پڑا۔ بھارتی میڈیا رپورٹس کے مطابق یہ واقعہ مدنی پور کے ایک گھر میں پیش آیا۔ خاتون کھانا تیار کر رہی تھی اور لاعلمی میں اس نے کچن میں موجود ایک برتن سے پانی سمجھ کر تیزاب کھانے میں ڈال دیا۔ اس تیزاب کا استعمال کھانے کو زہر آلود بنا گیا۔ جب اہل خانہ نے چاول اور سالن کھایا تو چند ہی لمحوں بعد ان کی طبیعت بگڑنے لگی۔ اس واقعے میں مجموعی طور پر چھ افراد متاثر ہوئے، جن میں دو کم عمر بچے بھی شامل ہیں۔ متاثرین کو فوری طور پر کلکتہ کے مقامی اسپتال منتقل کیا گیا، جہاں ڈاکٹرز نے ان کی حالت تشویشناک قرار دی۔ اسپتال ذرائع کے مطابق متاثرین کو فوری طبی امداد فراہم کی گئی اور ان کے علاج کے لیے خصوصی اقدامات کیے جا رہے ہیں۔ حکام کے مطابق یہ غفلت اس وجہ سے ہوئی کہ گھر کے سنتو سنیاسی نامی ایک فرد کا پیشہ تانبا اور چاندی کا کام کرنا ہے۔ اس کام کے دوران تیزاب استعمال ہوتا ہے، اسی لیے گھر میں تیزاب موجود تھا۔ بدقسمتی سے یہ تیزاب کچن میں بھی رکھا گیا تھا اور خاتون نے اسے عام پانی سمجھ کر اس سے کھانا بنا لیا۔ مقامی انتظامیہ نے واقعے کی تحقیقات شروع کر دی ہیں اور اہلِ خانہ کو ہدایت دی گئی ہے کہ تیزاب یا دیگر خطرناک کیمیکلز کو کچن سے دور محفوظ جگہ پر رکھا جائے۔ حکام نے عوام کو بھی متنبہ کیا ہے کہ اس طرح کے حادثات سے بچنے کے لیے گھروں میں کیمیکلز کو علیحدہ اور محفوظ طریقے سے ذخیرہ کیا جائے۔