امریکی شکاری کا کشمیر مارخور کا کامیاب شکار، لاکھوں ڈالرز ادا کیے

امریکی شکاری تھامس گیرک نے چترال کے شاشا تھوسی کمیونٹی مینیجڈ گیم ریزرو میں کشمیر مارخور کا کامیاب شکار کر لیا۔

وائلڈ لائف چترال کے حکام کے مطابق تھامس گیرک نے کشمیر مارخور کی ٹرافی ہنٹنگ کا پرمٹ 2 لاکھ 43 ہزار ڈالر یعنی 6 کروڑ 80 لاکھ پاکستانی روپے کی بولی لگا کر حاصل کیا تھا۔

امریکی شکاری تھامس گیرک نے یہ شکار 250 میٹر کے فاصلے سے کیا۔ شکار کے سینگ کا سائز 55 انچ ہے اور شکار ہونے والی مارخور کی عمر ساڑھے 13 سال ہے۔

75 سالہ تھامس نے کشمیر مارخور کے شکار کا پرمٹ رواں سال ہونے والی اوپن بولی میں حاصل کیا تھا۔

خیال رہے کہ کشمیر مارخور کا شمار معدومیت کے خطرے سے دوچار جانوروں میں ہوتا ہے اور 1990 کی دہائی میں چترال میں اس کی آبادی چند سو رہ گئی تھی۔ اس کے بعد محکمہ وائلڈ لائف نے مختلف عالمی تنظیموں کے اشتراک سے اس کی کنزرویشن کے اقدامات شروع کیے۔ کمیونٹی کی جانب سے اس کے شکار کو روکنے کے لیے ٹرافی ہنٹنگ متعارف کرائی گئی، جس سے حاصل ہونے والی آمدنی کا 80 فیصد کمیونٹی کی فلاح و بہبود پر خرچ کیا جاتا ہے۔ فاروق نبی کے مطابق ویلیج کنزرویشن کمیٹیاں یہ رقم خود خرچ کرتی ہیں۔