فیصل کریم کنڈی کو ہٹائے جانے کا امکان، نیا گورنر کے پی کون ہوگا؟

گورنر خیبرپختونخوا فیصل کریم کنڈی کو تبدیل کیے جانے کا امکان ظاہر کیا جا رہا ہے۔ ذرائع کے مطابق نئے گورنر خیبرپختونخوا کے لیے 6 نام زیر غور ہیں، زیر غور ناموں میں تین سیاسی شخصیات اور تین سابق فوجی افسران شامل ہیں۔ ذرائع کے مطابق گورنر کے لیے امیر حیدر خان ہوتی، آفتاب شیرپاؤ، پرویز خٹک، لیفٹیننٹ جنرل (ر) خالد ربانی، لیفٹیننٹ جنرل (ر) غیور محمود اور لیفٹیننٹ جنرل (ر) طارق خان کے نام زیر غور ہیں۔ لیفٹیننٹ جنرل (ر) غیور محمود اور لیفٹیننٹ جنرل (ر) طارق خان سابق آئی جی ایف سی رہ چکے ہیں جبکہ لیفٹیننٹ جنرل (ر) خالد ربانی سابق کور کمانڈر پشاور رہ چکے ہیں۔ میڈیا سے گفتگو کے دوران ایک صحافی نے فیصل کریم کنڈی سے پوچھا کہ آپ کو ہٹائے جانے کا امکان ہے، نئے گورنر کے لیے چند شخصیات کے نام بھی زیر غور ہیں، اس پر کیا کہیں گے؟ فیصل کریم کنڈی نے سوال کا جواب دیتے ہوئے اس معاملے پر لاعلمی کا اظہار کیا کہ انہیں نہیں پتہ کہ انہیں عہدے سے ہٹایا جا رہا ہے، انہوں نے کہا کہ اگر میڈیا ہی گورنر لگائے گا تو اللہ ہی حافظ ہے۔ پارٹی جو فیصلہ کرے گی وہ قبول ہوگا۔