بھارتی فلم ’دھرندھر‘ کا ٹریلر دیکھ کر چوہدری اسلم کی بیوہ سیخ پا

بالی وڈ اداکار رنویر سنگھ کی نئی آنے والی فلم ’دھرندھر‘ کا ٹریلر پر سندھ پولیس کے شہید افسر چوہدری اسلم کی بیوہ نورین اسلم نے سخت ناراضی کا اظہار کرتے ہوئے فلم سازوں کیخلاف قانونی چارہ جوئی کا عندیہ دے دیا۔ فلم میں رنویر سنگھ انڈین جاسوس کا مرکزی کردار نبھا رہے ہیں، اکشے کھنہ کو رحمٰن ڈکیٹ جبکہ سنجے دت کو چوہدری اسلم کے کرداروں میں دکھایا گیا ہے۔ چوہدری اسلم کی بیوہ نورین اسلم نے ایک انٹرویو میں کہا کہ فلم کے ٹریلر میں ایک جملہ کہا گیا کہ "شیطان اور جن سے پیدا ہونے والے بچے کو چوہدری اسلم کہتے ہیں"۔ نورین اسلم کے مطابق یہ جملہ نہ صرف چوہدری اسلم بلکہ ان کی والدہ کی کردار کشی ہے۔ انہوں نے کہا کہ ہم مسلمان ہیں، ہمارے معاشرے میں ایسی باتیں ناقابلِ قبول ہیں، اور چوہدری اسلم کی والدہ ایک نیک اور پاکیزہ خاتون تھیں۔ انہوں نے مزید کہا کہ اداکار قصوروار نہیں ہوتے بلکہ یہ رائٹرز کا کام ہے۔ بھارتی فلم ساز ہمیشہ پاکستان کو دہشتگرد ملک دکھاتے ہیں، لیکن اس بھارتی کرنل پر خاموشی اختیار کرلی گئی جس نے خود اعتراف کیا تھا کہ اس نے چوہدری اسلم پر جوا کھیلا۔ نورین اسلم نے کہا کہ چوہدری اسلم ہیرو ہے یا ولن، یہ سب کا اپنا نظریہ ہے، لیکن حقیقت یہ ہے کہ انہوں نے اپنی مٹی سے وفا کی۔ اسلم چوہدری کی بیواہ نے خبردار کیا کہ اگر فلم میں چوہدری اسلم کے خلاف کوئی پروپیگنڈا کرنے کی کوشش کی گئی تو وہ قانونی چارہ جوئی کریں گی۔