روہت شرما نے شاہد آفریدی کا سب سے زیادہ چھکوں کا ریکارڈ توڑ ڈالا

بھارت کے اسٹار بیٹر روہت شرما نے ون ڈے کرکٹ میں سابق پاکستانی بیٹر شاہد آفریدی کا سب سے زیادہ چھکے لگانے کا ورلڈ ریکارڈ توڑ دیا۔ بھارتی شہر رانچی میں جنوبی افریقا کے خلاف ون ڈے سیریز کے پہلے میچ میں روہت شرما نے اوپنر کی حیثیت سے 57 رنز کی اننگ کھیلی جس میں 3 چھکے بھی شامل تھے۔ تین چھکوں کے ساتھ روہت شرما کے ون ڈے انٹرنیشنل میں چھکوں کی تعداد 352 ہوگئی ہے جو کہ انہوں نے 269 اننگز میں لگائے ہیں۔ ان سے قبل ون ڈے کرکٹ میں سب سے زیادہ چھکے لگانے کا ورلڈ ریکارڈ پاکستان کے سابق کپتان و آل راؤنڈر شاہد آفریدی کے پاس تھا جنہوں نے 369 اننگز میں 351 چھکے لگائے تھے۔ تیسرے نمبر پر ویسٹ انڈیز کے کرس گیل ہیں جنہوں نے 294 اننگز میں 331 چھکے لگا رکھے ہیں۔ ون ڈے کے ساتھ ٹیسٹ اور ٹی ٹوئنٹی انٹرنیشنل کے مجموعی چھکوں کی دوڑ میں بھی روہت شرما سب سے آگے ہیں، انہوں نے انٹرنیشنل کرکٹ میں مجموعی طور پر 645 چھکے لگائے ہیں۔ دوسرے نمبر پر موجود کرس گیل موجود نے 553 چھکے لگائے ہیں، شاہد آفریدی 476 چھکوں کے ساتھ تیسری پوزیشن پر براجمان ہیں۔