بھارت کا غرور زمین بوس، جنوبی افریقہ نے ہوم گراؤنڈ پر بدترین شکست دیدی

جنوبی افریقا نے بھارت کا غرور خاک میں ملاتے ہوئے بھارت کو اس کی سرزمین پر کھیلے جانے والے ٹیسٹ میں بدترین شکست دیدی، جنوبی افریقہ نے دوسرے ٹیسٹ میچ میں بھارت کو شکست دے کر 25 سال بعد سیریز اپنے نام کر لی۔ بھارتی ریاست آسام کے شہر گوہاٹی میں کھیلے گئے دوسرے ٹیسٹ میچ میں جنوبی افریقہ نے بھارت کو 408 رنز سے شکست دے کر نہ صرف سیریز 2-0 سے جیت لی بلکہ 25 سال بعد بھارتی سرزمین پر ٹیسٹ سیریز جیتنے کا اعزاز بھی حاصل کر لیا۔ یہ بھارت کی ٹیسٹ تاریخ کی سب سے بڑی شکست ہے، جو رنز کے اعتبار سے کسی بھی ٹیم کے خلاف اب تک کی بدترین کارکردگی شمار کی جا رہی ہے دوسرے ٹیسٹ کی پہلی اننگز میں جنوبی افریقہ نے پہلے بیٹنگ کرتے ہوئے 489 رنز بنائے، جس میں سینوران متھوسامی کی شاندار سنچری اور مارکو یانسن کے 93 رنز شامل تھے۔ جواب میں بھارتی ٹیم پہلی اننگز میں صرف 201 رنز بنا سکی۔ جنوبی افریقہ نے دوسری اننگز میں پانچ وکٹوں کے نقصان پر 260 رنز بنائے اور پھر اننگز ڈکلیئر کردی، بھارت کو 549 رنز کا ناقابلِ یقین ہدف دیا۔ بھارتی بلے باز پہاڑ جتنا ہدف دیکھ کر دباؤ میں آگئے اور پوری ٹیم صرف 140 رنز پر ڈھیر ہو گئی۔ جنوبی افریقہ کے اسپنر سائمن ہارمر نے دوسری اننگز میں تباہ کن بولنگ کرتے ہوئے بھارت کی بیٹنگ لائن کو تہس نہس کر دیا، ان کی بولنگ نے بھارتی بلے بازوں کو مکمل طور پر بے بس کر دیا، سائمن ہارمر 6 وکٹیں لیکر میچ کے بہترین بولر قرار پائے، جبکہ مارکو یانسن کو آل راؤنڈ کارکردگی پر پلیئر آف دی میچ قرار دیا گیا۔ یہ جنوبی افریقہ کے لیے کئی حوالوں سے تاریخی فتح رہی، 25 سال بعد بھارتی سرزمین پر ٹیسٹ سیریز جیتنا، 408 رنز سے فتح حاصل کرکے بھارت کو سب سے بڑی شکست دی، ٹیمبا باووما نے بطور کپتان اپنی ناقابلِ شکست سیریز کا تسلسل برقرار رکھا۔ بھارتی ٹیم کی کارکردگی اس سیریز میں انتہائی مایوس کن رہی۔ پہلے ٹیسٹ میں وہ صرف 124 رنز کا ہدف حاصل نہ کر سکی اور 30 رنز سے ہار گئی۔ دوسرے ٹیسٹ میں تو مکمل طور پر بے بس نظر آئی۔ صرف رویندر جڈیجا نے 54 رنز کی مزاحمتی اننگز کھیلی، جبکہ سائی سدھرسن نے 138 گیندوں پر 14 رنز بنا کر کچھ دیر مزاحمت کی، مگر بھارتی ٹیم مجموعی طور پر ناکام رہی۔ اس شکست کے بعد بھارت کی ورلڈ ٹیسٹ چیمپئن شپ میں پوزیشن مزید نیچے چلی گئی، جبکہ جنوبی افریقہ نے ٹاپ ٹو میں اپنی جگہ مضبوط کر لی۔ یہ ٹیسٹ سیریز بھارتی کرکٹ کے لیے ایک وارننگ ہے کہ ہوم گراؤنڈ پر ناقابلِ شکست رہنے کا تاثر اب ماضی کی بات بنتا جا رہا ہے۔ جنوبی افریقہ کی یہ فتح نہ صرف ان کے لیے تاریخی ہے بلکہ بھارت کے لیے ایک لمحۂ فکریہ بھی۔