پاکستان نے ٹرمپ کا دل کیسے جیتا؟ بھارت کیوں ناکام ہوا؟ اہم وجوہات جانیے

پاکستان نے حالیہ برسوں میں امریکا کے ساتھ تعلقات کو بہتر بنانے کے لیے کئی اہم اقدامات کیے، جنہیں ماہرین ایک بڑی سفارتی کامیابی قرار دیتے ہیں۔

کابل ایئرپورٹ حملے کے مرکزی ملزم محمد شریف اللّٰہ کی گرفتاری اور امریکا کے حوالے کیے جانے کو اس تعلق میں فیصلہ کن موڑ سمجھا جاتا ہے۔ اس اقدام کے بعد صدر ڈونلڈ ٹرمپ نے کانگریس میں خطاب کرتے ہوئے پاکستان کا شکریہ ادا کیا اور اسے ایک اہم پیش رفت قرار دیا۔

ماہرین کے مطابق بھارت کے برعکس پاکستان نے ٹرمپ کو نوبل امن انعام کے لیے نامزد کر کے سفارتی برتری حاصل کی۔ کشمیر بحران کے دوران بھارت نے امریکی ثالثی کو مسترد کیا، جبکہ پاکستان نے سفارتکاری کے راستے کو ترجیح دی۔

پاکستان نے واشنگٹن میں مؤثر لابنگ کی اور ٹرمپ کے قریبی مشیروں کی خدمات حاصل کیں۔ اسی دوران جنرل عاصم منیر کے وائٹ ہاؤس دورے کو غیر معمولی اہمیت دی گئی، جسے صدر ٹرمپ نے سراہا۔

پاکستان نے مشرقِ وسطیٰ میں اپنی حیثیت کو ایک اہم شراکت دار کے طور پر پیش کیا، خاص طور پر سعودی عرب اور خلیجی ممالک کے ساتھ تعلقات کی بنیاد پر۔ اس کے علاوہ امریکا کے ساتھ 6 ٹریلین ڈالر مالیت کے معدنی وسائل کے معاہدے نے بھی پاکستان کی اہمیت میں اضافہ کیا۔

ماہرین کا کہنا ہے کہ اگرچہ پاکستان نے امریکا کے ساتھ تعلقات میں نمایاں کامیابیاں حاصل کی ہیں، لیکن کمزور معیشت اور خطے میں عدم استحکام مستقبل میں بڑے چیلنج ثابت ہو سکتے ہیں۔