فرانس کی وزارتِ داخلہ پر بڑا سائبر حملہ، ہیکرز نے حساس ڈیٹا تک رسائی حاصل کرلی

پیرس: فرانس کی وزارتِ داخلہ نے تصدیق کی ہے کہ سرکاری ویب سائٹس اور پیشہ ورانہ ای میل اکاؤنٹس پر ایک بڑا سائبر حملہ کیا گیا، جس کے نتیجے میں کچھ حساس سرکاری فائلوں تک غیر مجاز رسائی حاصل کی گئی۔

فرانسیسی وزیرِ داخلہ لوراں نونیز نے کہا کہ یہ حملہ ابتدائی اندازوں سے کہیں زیادہ سنگین ثابت ہوا ہے، حملہ آور وزارت کے متعدد پیشہ ورانہ ای میل اکاؤنٹس تک پہنچنے میں کامیاب رہے اور ان کے ذریعے کچھ اہم ڈیٹا تک رسائی حاصل کی گئی۔

وزیرِ داخلہ نے مزید کہا کہ حملہ ابھی مکمل طور پر واضح نہیں ہوا کہ کتنی فائلیں یا معلومات حقیقی طور پر متاثر ہوئیں اور وزارت اس کی تفصیلی تحقیقات کر رہی ہے۔ ابتدائی دعووں میں لاکھوں افراد کے ذاتی ڈیٹا تک رسائی کے بارے میں کہا گیا تھا، تاہم وزیر نے اسے مبالغہ آمیز قرار دیا اور کہا کہ صرف چند درجن فائلیں متاثر ہوئی ہیں۔