کرسمس نہیں واجپائی کی سالگرہ منائیں: اترپردیش کے اسکولوں میں کرسمس کی چھٹی منسوخ

بھارتی ریاست اتر پردیش میں بی جے پی حکومت کی جانب سے مسیحی برادری کے خلاف ایک اور متنازع اقدام سامنے آیا ہے، جہاں اسکولوں میں کرسمس کی تعطیل منسوخ کر دی گئی ہے۔

سرکاری ہدایات کے مطابق اسکولوں کو کرسمس کے بجائے سابق بھارتی وزیرِاعظم اٹل بہاری واجپائی کی سالگرہ کے حوالے سے تقریبات منعقد کرنے کا حکم دیا گیا۔

یہ فیصلہ ایسے وقت میں کیا گیا ہے جب بھارت بھر میں کرسمس کے موقع پر مسیحی برادری کے خلاف تشدد، ہراسانی اور عبادت گاہوں کو نشانہ بنانے کے واقعات کی خبریں سامنے آ رہی ہیں، جن کی ویڈیوز سوشل میڈیا پر بھی گردش کر رہی ہیں۔

اتر پردیش حکومت کے اس اقدام پر بھارتی کانگریس کی ترجمان سوپریا شرینات نے شدید ردِعمل کا اظہار کرتے ہوئے کہا ہے کہ نریندر مودی اور بی جے پی ملک بھر میں نفرت کو فروغ دے رہے ہیں اور مذہبی اقلیتوں کو مسلسل نشانہ بنایا جا رہا ہے، جس پر اب عالمی برادری بھی نظر رکھے ہوئے ہے۔

دوسری جانب ماہرین اور انسانی حقوق کی تنظیموں کا کہنا ہے کہ اسکولوں میں کرسمس کی چھٹی ختم کرنے سے مسیحی کمیونٹی میں خوف اور بے چینی بڑھ رہی ہے، اور یہ فیصلہ اقلیتوں کے آئینی و مذہبی حقوق کے منافی ہے۔