بالی ووڈ کے لیجنڈری اداکار دھرمیندر چل بسے

بھارتی فلم انڈسٹری کے ممتاز اداکار اور بالی ووڈ کے لیجنڈ دھرمیندر چل بسے، ان کی موت سے شائقین اور فلمی حلقوں میں غم کی لہر دوڑ گئی۔ بھارتی میڈیا کے مطابق 89 سالہ معروف اداکار گزشتہ کچھ عرصے سے علیل تھے، گزشتہ دنوں ان کو سانس سے متعلق شدید تکالیف کےباعث اسپتال میں داخل کیا گیا تھا۔ بھارتی میڈیا کا کہنا ہے کہ دھرمیندر کی آخری رسومات پون ہنس کریمیٹریم ممبئی میں ادا کی گئیں۔ رسومات میں ان کی اہلیہ اداکارہ ہیما مالنی اور بیٹی ایشو دیول سمیت بھارتی فلم انڈسٹری کے کئی بڑے نام شریک تھے جس میں امتابھ بچن، جیا بچن، ابھیشک بچن، عامر خان اور دیگر افراد بھی شامل تھے۔ معروف فلم ساز کرن جوہر نے بھی انسٹاگرام پر دھرمیندر کی موت کی تصدیق کی اور انہیں خراج تحسین پیش کرتے ہوئے کہا کہ مین اسٹریم سنیما کے ہیرو میگا اسٹار کا دور ختم ہوا۔ رپورٹس کے مطابق دھرمیندر نے آخری بار اپنی اداکاری کے جوہر فلم ’اکیس‘ میں دکھائے جو 25 دسمبر کو ریلیز ہونے والی ہے۔ دھرمیندر سنگھ دیول 1935 کو بھارتی پنجاب میں پیدا ہوئے، انہوں نے متعدد بلاک بسٹر فلموں سمیت 306 فلموں میں کام کیا۔ دھرمیندر نے 1960 میں فلم دل بھی تیرا ہم بھی تیرے سے فلمی کیریئر کا آغاز کیا، اپنی شاندار اداکاری اور منفرد انداز کے باعث وہ جلد ہی ناظرین کے دلوں پر چھا گئے۔ دھرمندر کو ہی مین آف انڈین سنیما کے لقب سے بھی یاد کیا جاتا ہے، انہوں نے شعلے، چپکے چپکے، دھرم ویر، سیتا اور گیتا اور یادوں کی بارات جیسی کلاسک فلموں سے بھارتی سنیما میں ناقابلِ فراموش مقام حاصل کیا۔ دھرمندر کا کیریئر چھ دہائیوں پر محیط رہا، جس دوران انہوں نے اپنی پرفارمنس، قدرتی دلکشی اور بے مثال ورسٹائل اداکاری کے ذریعے ناظرین کے دلوں میں اپنی خاص پہچان بنائی۔ انہوں نے ایکشن سے لے کر دل کو چھو لینے والی کامیڈی اور جذباتی فلموں میں شاندار کردار ادا کیے اور بھارتی سنیما کی تاریخ کے چند یادگار کردار تخلیق کیے۔