گلگت بلتستان کے"دیوسائی" نیشنل پارک میں ہوٹلنگ اور تجارتی سرگرمیوں پر پابندی

گلگت بلتستان : گلگت بلتستان حکومت نے آئندہ برس سیاحتی سیزن سے دیوسائی نیشنل پارک کی حدود میں کسی بھی قسم کے موسمی ہوٹل، رہائش گاہ یا تجارتی سرگرمیوں پر پابندی عائد کر دی ہے۔

فاریسٹ ڈپارٹمنٹ کی جانب سے جاری کردہ نوٹیفکیشن میں کہا گیا ہے کہ مذکورہ فیصلہ سیکرٹری جنگلات، جنگلی حیات و ماحولیات کے احکامات کی روشنی میں لیا گیا ہے تاکہ پارک کے قدرتی ماحول، جنگلی حیات اور حیاتیاتی تنوع کا تحفظ یقینی بنایا جا سکے۔

نوٹیفکیشن میں واضح کیا گیا ہے کہ پارک کے اندر ہوٹلوں یا دیگر تجارتی سرگرمیوں کے باعث ماحولیاتی نقصان اور جنگلی حیات میں خلل کا خدشہ رہتا ہے۔

ڈویژنل فاریسٹ افسر نے تمام متعلقہ ہوٹل مالکان اور منتظمین کو ہدایت کی ہے کہ وہ آئندہ سیزن کے لیے پارک کے اندر کوئی نئی سہولت قائم نہ کریں، اور احکامات کی خلاف ورزی کی صورت میں سخت قانونی کارروائی کی جائے گی۔

واضح رہے کہ ستمبر 2025 میں پاکستان کی گلوکارہ قرۃ العین بلوچ پر دیوسائی نیشنل پارک میں ریچھ کے حملے کے بعد رات کے وقت کیمپنگ پر پابندی بھی عائد کی گئی تھی، جو اس سیزن کے لیے برقرار ہے۔