ایران نے حالیہ جنگ میں امریکا اور اسرائیل کو تاریخی شکست دی: آیت اللہ خامنہ ای

ایرانی انقلاب سے تقویت تہران میں سرکاری ٹی وی سے نشر ہونے والے خطاب میں ایرانی سپریم لیڈر آیت اللہ علی خامنہ ای نے کہا ہے کہ غزہ اور لبنان میں سرگرم مزاحمتی تحریکیں ایرانی انقلاب کی اقدار اور اصولوں سے تقویت پاتی ہیں، جس کے نتیجے میں خطے میں ’’ظلم کے خلاف مؤثر اور متحد محاذ‘‘ تشکیل پایا ہے۔ آیت اللہ خامنہ ای کے مطابق حالیہ بارہ روزہ جنگ میں ایران نے امریکا اور اسرائیل کو ’’واضح اور تاریخی شکست‘‘ سے دوچار کیا۔ انہوں نے دعویٰ کیا کہ دشمن بھرپور تیاری اور منصوبہ بندی کے ساتھ آیا، لیکن ایرانی عوام کی استقامت اور دفاعی قوت کے باعث خالی ہاتھ واپس لوٹنے پر مجبور ہوا۔ خطاب میں انہوں نے کہا کہ اسرائیل نے اس جنگ کے لیے دو دہائیوں تک منصوبہ بندی کی تھی، مگر ایران کے دفاعی نظام اور قومی مزاحمت کے سامنے تمام منصوبے ناکام ہوگئے۔ ان کے بقول امریکا اور اسرائیل نے ایران پر حملے میں ہر حربہ استعمال کیا، لیکن انہیں اپنے مقاصد کے حصول میں ’’سرے سے ناکامی‘‘ کا سامنا کرنا پڑا۔ سپریم لیڈر نے ایرانی قوم کی ثابت قدمی کو سراہتے ہوئے کہا کہ عوام نے ایک بار پھر دکھا دیا ہے کہ ملک بیرونی جارحیت کا بھرپور جواب دینے کی صلاحیت رکھتا ہے۔ انہوں نے اس بات پر بھی زور دیا کہ خطے کی مزاحمتی قوتیں ایرانی نظریے سے تحریک پا کر مضبوط ہو رہی ہیں، جو مشرقِ وسطیٰ کی سیاسی صورتحال پر گہرے اثرات مرتب کر رہی ہے۔ تہران میں دیا گیا یہ خطاب خطے میں جاری تناؤ اور عسکری کشیدگی کے پس منظر میں خاص اہمیت کا حامل سمجھا جا رہا ہے۔