کراچی کے چڑیا گھر میں ننھے شیروں کی آمد

کراچی چڑیا گھر میں شیرنی نے تین بچوں کو جنم دیا ہے۔ وٹرنری ٹیم نے طبی معائنے کے بعد تصدیق کی ہے کہ شیرنی اور اس کے تینوں بچے مکمل طور پر صحت مند ہیں۔ ٹیم کے مطابق ماں اور بچے دونوں کی حالت تسلی بخش ہے اور ان کی دیکھ بھال کے لیے خصوصی انتظامات کیے گئے ہیں۔ میئر کراچی مرتضیٰ وہاب نے نوزائیدہ شیروں کی آمد کی ویڈیو سوشل میڈیا پر شیئر کی اور چڑیا گھر انتظامیہ کو ہدایات جاری کیں کہ شیرنی اور اس کے بچوں کی نشوونما اور غذا کے لیے مرتب کردہ وٹرنری پلان پر سختی سے عمل درآمد کیا جائے۔ چڑیا گھر حکام کے مطابق نوزائیدہ شیروں کو فی الحال عوامی نمائش کے لیے محدود رکھا گیا ہے تاکہ ان کی صحت اور نشوونما پر کوئی اثر نہ پڑے۔ حکام نے مزید کہا کہ مناسب وقت پر عوام کو ان ننھے شیروں کو دیکھنے کا موقع فراہم کیا جائے گا۔