امریکا کو ’CIA‘ بنانے کی ضرورت کیوں پیش آئی؟

دوسری جنگِ عظیم کے دوران دنیا آگ میں جل رہی تھی۔ یورپ کے شہروں پر بم برس رہے تھے، ایشیا میں فوجیں ٹکرا رہی تھیں اور بحرالکاہل میں امریکہ اور جاپان کی لڑائی اپنے عروج پر تھی۔ ان حالات میں امریکہ کو ایک ایسے ادارے کی ضرورت محسوس ہوئی جو دشمن راز جان سکے۔ اسی مقصد کے لیے OSS (Office of Strategic Services) بنایا گیا۔ جنرل ولیم "وائلڈ بل" ڈونوان اس کے سربراہ تھے۔ یہ ادارہ خفیہ مشنز، جاسوسی اور دشمن کی معلومات اکٹھی کرنے میں کامیاب رہا۔ OSS کے ایجنٹ یورپ کے جنگلوں میں چھپے، دشمن کے پیچھے جا کر خبریں لائے اور کئی بار ایسی معلومات فراہم کیں جنہوں نے جنگ کا رخ بدل دیا۔ پھر جب 1945 میں جنگ ختم ہوئی تو دنیا نے سکون کا سانس لیا، لیکن سکون زیادہ دیر نہ رہا۔ امریکہ نے OSS کو بند کر دیا، یہ سوچ کر کہ اب اس کی ضرورت نہیں۔ مگر جلد ہی ایک نئی حقیقت سامنے آئی، سوویت یونین طاقتور ہو رہا تھا اور سرد جنگ کا آغاز ہو چکا تھا۔ امریکی صدر ہیری ٹرومین کے سامنے سوال تھا: "کیا ہم دشمن کے منصوبے بغیر کسی مستقل ادارے کے جان سکتے ہیں؟" پرل ہاربر کے حملے کی یاد ابھی تازہ تھی، جب امریکہ کو جاپان کے حملے کا پہلے سے علم نہ ہو سکا تھا۔ یہ ایک سبق تھا کہ بغیر خفیہ معلومات کے ایک قوم اندھی رہتی ہے۔ پھر 1947 میں صدر ٹرومین نے ایک تاریخی قدم اٹھایا۔ انہوں نے National Security Act پر دستخط کیے۔ اس قانون نے امریکہ کو ایک نیا ادارہ دیاCIA ۔ (Central Intelligence Agency) یہ ادارہ صرف کاغذی نہیں تھا۔ اس کے قیام کے ساتھ ہی امریکہ نے دنیا بھر میں اپنی آنکھیں اور کان بچھا دیے۔ CIA کا مقصد تھا: دنیا بھر سے معلومات اکٹھی کرنا۔ ان معلومات کا تجزیہ کر کے صدر اور حکومت کو بتانا۔ خفیہ مشنز چلانا، دشمن کے منصوبے ناکام بنانا اور covert operations کرنا۔ سی آئی اے کا اصل امتحان سرد جنگ میں شروع ہوا۔ سوویت یونین اور امریکہ ایک دوسرے کے خلاف خاموش جنگ لڑ رہے تھے۔ یہ جنگ توپوں اور بموں سے نہیں، بلکہ رازوں اور خفیہ منصوبوں سے لڑی جا رہی تھی۔ سی آئی اے کے ایجنٹ ماسکو کی گلیوں میں خاموشی سے گھومتے، برلن کی دیوار کے قریب خبریں اکٹھی کرتے، اس کے علاوہ دنیا کے مختلف ملکوں میں بھہ خفیہ آپریشنز سرانجام دیتے تھے۔ کئی بار CIA نے ایسی معلومات فراہم کیں جنہوں نے امریکہ کو بہت بڑے خطرات سے محفوظ رکھا۔ اسی طرح وقت کے ساتھ CIA ایک طاقتور ادارہ بن گیا۔ اس کے پاس نہ صرف جاسوسی کی صلاحیت تھی بلکہ حکومتیں بدلنے کی طاقت بھی آگئی۔ کئی ملکوں میں CIA نے خفیہ آپریشنز کیے، بعض کامیاب ہوئے، بعض ناکام۔ دنیا میں CIA کا نام ایک خفیہ ادارے کے طور پر مشہور ہوا۔ کچھ لوگ اسے امریکہ کی حفاظت کا ضامن سمجھتے تھے، اور کچھ اسے ایک ایسا ادارہ کہتے تھے جو دوسروں کے معاملات میں مداخلت کرتا ہے۔