عالمی بینک نے پاکستان کے لیے 700 ملین ڈالر منظور کر لیے

اسلام آباد: عالمی بینک نے پاکستان کے لیے 700 ملین ڈالر کی فنانسنگ کی منظوری دے دی ہے اور یہ رقم پاکستان پبلک ریسورسز فار انکلوژو ڈیولپمنٹ پروگرام کے تحت فراہم کی جائے گی،جبکہ منصوبے کا مقصد ملکی معیشت میں استحکام اور عوامی خدمات کے نظام کو بہتر بنانا ہے۔

عالمی بینک کے مطابق اس پروگرام کے تحت مجموعی طور پر 1.35 ارب ڈالر تک مالی معاونت فراہم کی جائے گی، جس میں سے 600 ملین ڈالر وفاقی حکومت جبکہ 100 ملین ڈالر صوبہ سندھ کے لیے مختص کیے گئے ہیں۔ فنڈز کا اجرا مقررہ اصلاحاتی اہداف کی تکمیل سے مشروط ہوگا۔

عالمی بینک کا کہنا ہے کہ یہ پروگرام ٹیکس نظام میں اصلاحات، شفاف مالی نظم و نسق اور سرکاری وسائل کے مؤثر استعمال پر توجہ مرکوز کرتا ہے،اس کے ساتھ ساتھ ڈیجیٹل ڈیٹا اور مالیاتی نظام کی بہتری کے ذریعے عوام کو فراہم کی جانے والی خدمات کے معیار میں بہتری لانے کا ہدف رکھا گیا ہے۔

اعلامیے کے مطابق یہ پروگرام آئی ایم ایف کے ایکسٹینڈڈ فنڈ فیسلٹی پروگرام سے ہم آہنگ ہے، جبکہ صوبہ سندھ میں صحت اور تعلیم کے شعبوں کے لیے وسائل میں اضافے کی بھی توقع ہے۔ عالمی بینک کا کہنا ہے کہ ان اصلاحات سے شفافیت بڑھے گی اور عوامی اعتماد کو فروغ ملے گا۔