موجودہ حالات میں وزیراعظم بنیں گے؟ صحافی کےسوال پربلاول نے کانوں کو ہاتھ لگالئے

لاہور:پاکستان پیپلز پارٹی کے چیئرمین بلاول بھٹو زرداری نے کہا ہے کہ 20 صوبے بنانے سے قبل وہاں بنائے جائیں، جہاں پر اتفاق رائے ہے۔ بانی پی ٹی آئی سے ذاتی اختلافات نہیں ہیں تاہم اس کا طریقہ کار غلط ہے۔

چیئرمین پیپلز پارٹی نے صحافیوں سے ملاقات کے دوران کیا۔ بلاول بھٹو زرداری نے کہا کہ پنجاب نے ایک صوبہ بنانے کی قرارداد پاس کی تھی، لیکن جب اس معاملے پر اتفاق ہوا تو پیپلز پارٹی کے پاس اکثریت نہیں تھی۔ قومی اسمبلی میں نئے صوبے بنانے پر اتفاق ہے، 20 صوبے بنانے ہیں تو سب سے پہلے وہاں بنائیں، جہاں اتفاق رائے موجود ہے۔

ایک سوال کے جواب میں چیئرمین پیپلز پارٹی کا کہنا ہے کہ میں پنجاب جاتا ہوں تو کسی کو ہضم نہیں ہوتا، ہر سیاسی جماعت کو موقع ملنا چاہیے، میں نے پنجاب سمیت کسی بھی صوبے کے خلاف بات نہیں کہ پھر بھی ہمیں برداشت نہیں کیا جا رہا۔

بلاول بھٹو زرداری کا کہنا تھا کہ پی ٹی آئی کا رویہ مسلسل خراب رہا ہے، بانی پی ٹی آئی تاحال اس راستے پر چل رہے ہیں، جس سے سسٹم دبائو میں آجا تا ہے۔ بانی پی ٹی آئی سے ذاتی اخلافات نہیں ہیں، اس کا طریقہ کار غلط ہے۔

بلاول بھٹو زرداری نے ملاقات میں کہا کہ حکومتیں ڈنڈنے کے زور پر معیشت چلانے کی کوشش کرتی ہیں، معیشت ڈنڈے کے زور پر نہیں بلکہ پیار سے چلائی جاتی ہیں۔

گورنر سندھ کے تبدیلی سے متعلق سوال کے جواب میں چیئرمین پیپلز پارٹی کا کہنا تھا کہ ہم نے انہیں (مسلم لیگ نواز) کو کہا کہ سندھ میں اپنا گورنر لائیں، لیکن وہ نہ مانے۔

بلاول بھٹو نے کہا کہ ایک پارلیمنٹ سے دو آئینی ترامیم کافی ہیں، مزید کی گنجائش نہیں، موجودہ تجاویز پر عملدرآمد کرنا ہے تو فوری کرلیں، جو کام ہونا ہے وہ ہو رہا ہے۔ آئین ایسی دستاویز نہیں کہ بار بار تبدیل کیا جائے.

موجودہ حالات میں وزیراعظم بنیں گے؟صحافی کےسوال پربلاول نے کانوں کو ہاتھ لگالئے، البتہ جواب دیا کہ جب عوام نے ووٹ دیا تو ضرور وزیر اعظم بنیں گے۔