چمن بارڈر پرافغانستان سے فائرنگ،پاکستان کی ذمہ دارانہ کارروائی

اسلام آباد: وزارت اطلاعات نے کہا ہے کہ چمن بارڈر پر افغانستان کی جانب سے کچھ عناصر نے پاکستانی پوسٹوں پر بلا اشتعال فائرنگ کی، جس پر سیکیورٹی فورسز نے فوری اور مؤثر ردعمل دیتے ہوئے ذمہ دارانہ کارروائی کی اور صورتحال پر قابو پا لیا۔ وزارت اطلاعات کے مطابق فائرنگ کا آغاز افغانستان کی طرف سے ہوا، تاہم پاکستانی فورسز نے جنگ بندی کو برقرار رکھتے ہوئے پیمانہ شدہ جواب دیا۔

ترجمان نے افغان جانب سے پھیلائے گئے دعووں کو سختی سے مسترد کرتے ہوئے کہا کہ پاکستان سرحدی نظم و ضبط اور خطے میں امن و استحکام کے لیے پُرعزم ہے۔ وزارت اطلاعات نے واضح کیا کہ ملکی سالمیت اور شہریوں کے تحفظ کے لیے ہر ضروری اقدام اٹھایا جائے گا۔

مزید کہا گیا کہ پاکستان جاری مذاکرات کے لیے سنجیدہ ہے اور افغان حکام سے باہمی تعاون کی توقع رکھتا ہے۔

واضح رہے کہ استنبول میں آج پاکستان اور افغان طالبان حکومت کے درمیان مذاکرات کا تیسرا دور جاری ہے، جس میں سرحدی امور اور باہمی تعلقات پر بات چیت ہو رہی ہے۔