100 روپےکا دودھ خراب نکلنے کی شکایت کرنے والے کو دودھ فروشوں نے قتل کر دیا

مظفرگڑھ کے علاقے شاہجمال میں اعجاز نامی شخص نے ایک ہوٹل سے 100 روپے کا دودھ خریدا، مگر گھر پہنچ کر دودھ خراب نکلا۔ اہلخانہ کے مطابق جب اعجاز شکایت کرنے ہوٹل گیا تو مالک آصف اور اس کے بھائی طارق و عارف نے اسے مکوں اور تھپڑوں سے شدید تشدد کا نشانہ بنایا۔ حالت بگڑنے پر اعجاز کو دیہی مرکز صحت شاہجمال منتقل کیا گیا، مگر وہ جانبر نہ ہو سکا۔ پولیس کے مطابق مرنے والا شخص دل کا مریض بھی تھا، تاہم اصل وجہِ موت تشدد تھا یا بیماری؟ اس پر تحقیقات جاری ہیں۔ مرنے والے کے بھائی مشتاق کی مدعیت میں ہوٹل مالک اور اس کے بھائیوں کے خلاف مقدمہ درج کر لیا گیا ہے، جبکہ ملزمان کی گرفتاری کے لیے کارروائیاں جاری ہیں۔