طلبا رہنما غنی امان چانڈیو بھی رہا

کراچی: سندھ کے طلبہ رہنما سرمد میرانی کے بعد غنی امان چانڈیو کو بھی عدالتی حکم پر آزاد کردیا گیا۔ سنٹرل جیل کراچی سے غنی امان جیسے ہی باہر آئے تو اہل خانہ اور دوستوں نے پھولوں سے استقبال کیا۔ نوجوان سرمد میرانی گذشتہ روز ضمانتی مچلکے جمع کرانے کے بعد آزاد ہوگئے تھے۔ تاہم حکام کے مطابق حیدرآباد میں درج مقدمے میں انٹیمیشن لیٹر جمع نہ ہونے کے باعث غنی امان چانڈیو گذشتہ روز آزاد نہ ہو سکے تھے، آج 28 نومبر کو لیٹر جمع ہونے کے بعد سنٹرل جیل حکام نےطلبہ رہنما کو آزاد کردیا۔ گذشتہ روز 27 نومبر 2025ع کو انسداد دہشتگردی عدالت نے طلبہ رہنماوں کی درخواست ضمانت منظور کرتے ہوئے 50-50 ہزار روپے کے ضمانتی مچلکے جمع کرانے کا حکم دیا تھا۔ اسی روز سندھ ہائی کورٹ نے غنی امان چانڈیو اور سرمد میرانی پر دہشتگردی کا مقدمہ ختم کرنے سے متعلق درخواست مسترد کردی تھی۔ کیس کا پسمنظر تین ہفتے قبل طلبہ رہنما سرمد میرانی اور غنی امان چانڈیو کو گرفتار کر کے نامعلوم مقام پر منتقل کردیا تھا، تاہم سندھ کے مختلف علاقوں میں احتجاج اور سوشل میڈیا پر شدید رد عمل کے بعد سی ٹی ڈی کی جانب سے دونوں کی گرفتاری ظاہر کی گئی۔ اہلخانہ کے مطابق غنی امان چانڈیو کو ہسپتال اور سرمد کو گھر سے اٹھایا گیا تھا، جس کے بعد دہشگردی کا مقدمہ دائر کرکے کراچی میں جوڈیشل مجسٹریٹ کے روبرو پیش کیا گیا۔ جوڈیشل مجسٹریٹ نے دونوں کو مقدمے سے بری کر دیا تھا، جبکہ سندھ ہائیکورٹ نے جوڈیشل مجسٹریٹ کا فصلہ کالعدم قرار دے دیا۔ عدالت نے سی ٹی ڈی کو ریمانڈ انسداد دہشت گردی عدالت میں پیش کرنے کا حکم دیا تھا۔