عمران اوران کے لانے والوں کو کیفرِ کردار تک پہنچانے پر لیگی قیادت کے درمیان تضاد؟

مسلم لیگ ن کی قیادت ملک کی تباہی کا ذمہ دار بانی پی ٹی آئی عمران خان اور ان کو اقتدار میں لانے والوں کو قرار دیتی ہے لیکن فی الوقت ان کو انجام تک پہچانے کے معاملے پر لیگی قیادت کے بیانات میں تضاد نے سوالات اٹھا دیے۔ گزشتہ روز مسلم لیگ ن کے قائد نواز شریف نے ضمنی انتخابات میں کامیاب ہونے والے نومنتخب ارکان اسمبلی سے خطاب کرتے ہوئے کہا تھا کہ نو منتخب اراکین اسمبلی کو مبارکباد دیتا ہوں، اللہ کے فضل سے جھوٹ، گالم گلوچ، بدتمیزی، بدتہذیبی اور فتنے کو شکست ہوئی۔ انہوں نے کہا تھا کہ پاکستان کو ہم نے اخلاقی، معاشرتی دیوالیہ پن سے بھی بچایا ہے۔ عمران خان اکیلا مجرم نہیں، اس کو لانے والے بھی برابرکےشریک ہیں، ان سب کا برابر احتساب ہونا چاہیے۔ نوازشریف نے کہا تھا کہ دوسروں کو چور اور ڈاکو کہنے والے خود چور ثابت ہوئے۔ عمران خان اور ان کو اقتدار میں لانے والوں کے احتساب کے مقاملے پر وزیرِ اعظم شہباز شریف کے مشیر برائے سیاسی امور سینیٹر رانا ثناء اللّٰہ کے بیان نے نوازشریف کے بیان کی نفی کردی ہے۔ پارلیمنٹ ہاؤس میں میڈیا سے گفتگو کے دوران رانا ثنا اللہ نے کہا کہ پاکستان میں تباہی کے ذمہ داربانی پی ٹی آئی اور وہ لوگ ہیں جو2018 میں انہیں اقتدارمیں لائے۔ ان کا کہنا تھا کہ بانی پی ٹی آئی کے اقتدار میں آنے کے بعد جو 4 سال گزرے انہی میں تباہی ہوئی، بہت کوششوں کے باوجود وہ 4 سالہ تباہی ختم نہیں ہورہی۔ رانا ثنا اللہ یہاں تک بھی نوازشریف کیساتھ متفق نظر آئے کہ اس ساری تباہی کی ذمہ دار اُس وقت کی اسٹبلشمنٹ ہے۔ ان کا کہنا تھا کہ جنرل فیض حمید کا ٹرائل چل رہا ہے۔ تاہم احتساب کے معاملے پر وزیراعظم شہبازشریف کے مشیر رانا ثنا اللہ نے نیا موقف اپنایا، ان کے بقول پاکستان میں تباہی کے ذمہ داربانی پی ٹی آئی اور ان کو لانے والے سارے چہرے خود ہی اپنے انجام کو پہنچیں گے۔ رانا ثنا اللہ نے کہا کہ اِس وقت مسلم لیگ ن کی ترجیحات ان کو انجام تک پہنچانا نہیں ہے، اس وقت ہماری ترجیحات یہ ہیں کہ ملک کو سنبھالا جائے، ہماری کوشش ہے ملک کو ترقی دی جائے،عام آدمی کو آسانی دی جائے۔