انڈونیشیا میں قدرتی آفات سے تباہی ،900سے زائد ہلاکتیں

انڈونیشیا کے تین صوبوں میں سمندری طوفان سے پیدا ہونے والے تباہ کن سیلاب اور لینڈ سلائیڈنگ نے تباہی مچا دی ہے۔ سرکاری اعداد و شمار کے مطابق ہلاکتوں کی تعداد بڑھ کر 908 تک پہنچ گئی ہے، جبکہ 410 افراد کا ابھی تک کوئی سراغ نہیں مل سکا۔ اسی طوفانی سسٹم نے جنوبی تھائی لینڈ اور ملائیشیا میں بھی تقریباً 200 جانیں لے لیں۔

سماٹرا کے شمال مشرقی ساحل پر واقع آچے تامیانگ کے متاثرہ علاقے کے لوگوں نے روئٹرز کو بتایا کہ امداد تک پہنچنے کے لیے انہیں گرے ہوئے درختوں اور الٹی پڑی گاڑیوں کے درمیان سے گزرتے ہوئے تقریباً ایک گھنٹہ پیدل چلنا پڑا۔

رضاکار وہاں موجود لوگوں میں صاف کپڑے تقسیم کر رہے ہیں جبکہ ایک ٹینکر کے ذریعے تازہ پانی لایا جا رہا ہے تاکہ متاثرین اپنی ضرورت کے مطابق بوتلیں بھر سکیں۔