ترکیہ پاکستان کو اپنے ففتھ جنریشن لڑاکا طیاروں کے پروگرام میں بھی شامل کرنا چاہتا ہے۔
اسلام آباد: امریکی جریدے بلوم برگ کے مطابق ترکیہ نے پاکستان میں جنگی ڈرون تیار کرنے کی فیکٹری قائم کرنے کا ارادہ ظاہر کیا ہے۔ رپورٹ کے مطابق ترکیہ پاکستان کو اپنے ففتھ جنریشن لڑاکا طیاروں کے پروگرام میں بھی شامل کرنا چاہتا ہے۔
منصوبے سے متعلق باخبر ترک عہدیداروں نے بتایا کہ پاکستان میں ڈرون بنانے کے منصوبے پر بات چیت جاری ہے۔ اس منصوبے کے تحت اسٹیلتھ اور طویل فاصلے تک پرواز کرنے والے ڈرونز کے پرزے ترکیہ سے پاکستان برآمد کیے جائیں گے، جہاں انہیں جوڑ کر مکمل ڈرون تیار کیا جائے گا۔
بلوم برگ نے لکھا ہے کہ اس خبر پر اب تک ترکیہ اور پاکستانی حکام نے کوئی تبصرہ نہیں کیا۔ تاہم دونوں ممالک دفاعی شعبے میں پہلے ہی قریبی تعاون کر رہے ہیں۔ ترکیہ مشترکہ پیداواری معاہدے کے تحت پاکستانی بحریہ کے لیے جنگی جہاز تیار کر رہا ہے اور پاکستان کے درجنوں لڑاکا طیاروں کو اپ گریڈ بھی کر چکا ہے۔
ماہرین کے مطابق یہ منصوبہ پاکستان کے دفاعی شعبے میں ایک اہم پیش رفت ثابت ہو سکتا ہے، جو نہ صرف ملکی دفاعی صلاحیت کو بڑھائے گا بلکہ خطے میں اسٹریٹجک تعاون کو بھی مزید مضبوط کرے گا۔