انٹرنیشنل
روسی صدر کا سخت بیان اُس وقت سامنے آیا جب امریکہ کی جانب سے روس اور یوکرین کے درمیان امن مذاکرات کسی پیش رفت کے بغیر ختم ہو گئے۔
پوتن نے عوامی خطاب اور میڈیا سے کہا کہ یورپی ممالک مسلسل کشیدگی بڑھا رہے ہیں اور اگر وہ جنگ کی طرف بڑھتے ہیں تو روس جواب دینے کی مکمل صلاحیت رکھتا ہے۔
انہوں نے دعویٰ کیا کہ یورپ کے رویّے سے امن کا امکان کم ہو رہا ہے اور مغربی ممالک روس کو کمزور کرنے کی کوشش کر رہے ہیں۔
دوسری جانب امریکہ کے نمائندے اسٹیو وٹکوف اور جیرڈ کشنر نے ماسکو میں یوکرین جنگ کے حل کے لیے اعلیٰ سطح کی ملاقاتیں کیں، تاہم مذاکرات کسی عملی نتیجے تک نہ پہنچ سکے۔
روسی صدر کے مشیر کے مطابق بات چیت مفید تھی لیکن اختلافات برقرار ہیں اور ابھی مزید کام کی ضرورت ہے۔
روس نے کہا کہ امریکہ نے کچھ ایسے نکات پیش کیے جو روس کے لیے قابلِ قبول نہیں تھے، جبکہ امریکہ کا موقف ہے کہ جنگ کے خاتمے کے لیے دونوں فریقوں کو لچک دکھانا ہوگی۔
