جب عمران خان وسیم اکرم کو جزیرے پر چھوڑ کر خاتون کیساتھ چلے گئے

سوئنگ کے سلطان وسیم اکرم نے اپنے ایک پرانے انٹرویو میں سابق کپتان و سابق وزیراعظم عمران خان سے متعلق دلچسپ قصے سناتے ہوئے حیران کن انکشاف کیا کہ ایک بار عمران خان انہیں ایک جزیرے پر چھوڑ کر خاتون سے باتیں کرنے کیلئے ان کے گھر چلے گئے تھے۔ انٹرویو کے دوران میزبان کے اس سوال پر کہ بطور نوجوان کھلاڑی عمران خان کیسے تھے؟ وسیم اکرم نے بتایا کہ میرے لیے یہ ایک فن تھا۔ عمران خان نے مجھ سے کہا کہ چلو نائٹ کلب چلتے ہیں، میں نے ان سے کہا کہ میں تیار ہوں۔ وہاں گئے تو عمران خان نے بار میں دودھ کا آرڈر دیا کیونکہ انہوں نے اپنی زندگی میں کبھی شراب نہیں پی ہے۔ وہ بڑا عجیب تھا کہ انہیں بار میں دودھ مل گیا۔ اس کے بعد صرف لڑکیوں کی ایک قطار تھی جو عمران خان سے ہاتھ ملارہی تھی۔ وسیم اکرم نے کہا کہ عمران خان کی طلسماتی شخصیت ہے۔ وہ آکسفورڈ کے تعلیم یافتہ ہیں، اچھی بات کر سکتے ہیں۔ اس کے ساتھ ساتھ وہ ہینڈ سم تھے، اس وقت ان کا شمار دنیا کے بہترین آل راؤنڈرز میں ہوتا تھا۔ سابق کپتان کا کہنا تھا کہ ہم جہاں بھی جاتے تھے، عمران خان کے اچھے دوست وہاں پر ہوتے تھے، ہم نے 1987 میں بھارت کا دورہ کیا تھا، ہم پاکستان میں وی سی آر پر بھارتی فلمیں دیکھا کرتے تھے، وہ تمام بھارتی اداکارائیں عمران خان سے ملاقات کے لیے آتی تھیں۔ عمران خان اپنی کولڈ ڈرنک کے ساتھ بیٹھے ہوتے جبکہ تمام اداکارائیں عمران خان کے ارد گرد بیٹھا کرتی تھیں۔ میں دور بیٹھ کر دیکھا کرتا تھا کہ سب لوگ عمران خان کو دیکھ رہے ہیں۔ انٹرویو کے دوران وسیم اکرم نے ایک اور دلچسپ واقعہ سناتے ہوئے کہا کہ 1988ء میں گیانا میں ٹیسٹ میچ تھا، اس وقت 3 دن کے بعد ایک دن آرام کا ہوتا تھا جس کے بعد 2 دن مزید میچ ہوتا تھا، آرام والے دن عمران خان نے کہا کہ ہم ٹرپ پر جارہے ہیں۔ سابق کپتان وسیم اکرم کے نے بتایا کہ عمران خان ہمیں اپنی ایک خاتون دوست کے ہمراہ ایئر پورٹ پر لے گئے، ان کا اپنا طیارہ تھا، ہم نجی جہاز میں بیٹھے اور تقریباً 45 منٹ کی مسافت کے بعد ایک جزیرے پر پہنچے جو بظاہر خاتون کے والد کا تھا، عمران خان اپنی خاتون دوست کے ساتھ باتیں کرنے کے لیے گھر میں چلے گئے۔ وسیم اکرم نے کہا کہ میرے ساتھ اعجاز بھی تھا، ہم نے سوچا کہ اب ہمیں کیا کرنا چاہیے ؟ ہمیں یہ بھی نہیں پتا تھا کہ ہوٹل واپس کیسے جائیں گے، ہم جنوبی امریکا میں ایک جزیرے پر تھے۔ جزیرے پر چند مزدور لڑکے تھے جو ہمیں جانتے تھے، انہوں نے ہم سے پوچھا کہ آپ کشتی پر جانا چاہیں گے۔ ہم تقریباً 7 سے 8 گھنٹے دریا میں گھومتے رہے اور جب واپس آئے تو عمران خان جانے کے لیے تیار تھے۔