وکٹ کے دونوں جانب کھیلنے والے میر جعفر اور میر صادق ہیں:عمران خان پارٹی رہنماؤں پر برہم

سابق وزیرِ اعظم اور بانی پی ٹی آئی عمران خان نے اپنے ایکس اکاؤنٹ پر جاری ایک بیان میں پارٹی رہنماؤں کی این ڈی یو ورکشاپ میں شرکت پر شدید ناراضی کا اظہار کیا ہے۔

انہوں نے کہا کہ جب وہ اور ان کے ساتھی سختیوں اور پابندیوں کا سامنا کر رہے ہیں، ایسے میں پی ٹی آئی کے بعض لوگ ’’ہم پر ظلم ڈھانے والوں‘‘ سے تعلقات بنائیں، یہ انتہائی افسوسناک ہے۔

عمران خان نے اپنے بیان میں کہا کہ ’’وکٹ کے دونوں جانب کھیلنے والوں‘‘ اور مفاہمت کے نام پر پس پردہ رابطوں میں مصروف افراد کے لیے پی ٹی آئی میں کوئی جگہ نہیں۔

انہوں نے ایسے لوگوں کو ’’میر جعفر‘‘ اور ’’میر صادق‘‘ سے تشبیہ دیتے ہوئے کہا کہ پارٹی صرف مزاحمت کرنے والوں کے ساتھ کھڑی ہے۔

عمران خان نے خیبر پختونخوا میں ممکنہ گورنر راج کی اطلاعات پر انتہائی سخت مؤقف اپنایا اور کہا کہ اگر گورنر راج لگانا ہے تو ’’کل کی بجائے آج لگا دیں، پھر نتائج بھی دیکھ لیں۔‘‘

اپنے بیان میں عمران خان نے اعلان کیا کہ وہ تحریک انصاف کی موجودہ سیاسی کمیٹی تحلیل کر رہے ہیں، انہوں نے سیکرٹری جنرل سلمان اکرم راجہ کو مکمل اختیار دیا کہ وہ ایک نئی اور مختصر کمیٹی تشکیل دیں جو آئندہ کی سیاسی حکمتِ عملی ترتیب دے اور اس پر عمل بھی کروائے۔

ساتھ ہی انہوں نے شاہد خٹک کو قومی اسمبلی میں پی ٹی آئی کا پارلیمانی لیڈر مقرر کر دیا۔ جبکہ محمود خان اچکزئی اور علامہ راجہ ناصر عباس کے لیے خصوصی احترام کا اظہار کیا۔