بھارت میں مسلم خاتون کا نقاب زبردستی ہٹانا سنگین حملہ ہے: ایمنسٹی انٹرنیشنل

انسانی حقوق کی عالمی تنظیم ایمنسٹی انٹرنیشنل نے بھارت کی ریاست بہار کے وزیراعلی کی جانب سے مسلم خاتون کا نقاب اتارنے کے واقعے کو سنگین حملہ  اور خواتین کے بنیادی حقوق کی خلاف ورزی قرار دے دیا۔

ایمنسٹی انٹرنیشنل نے کہا ہے کہ کسی عوامی عہدے دار کی جانب سے کسی خاتون کا حجاب یا نقاب زبردستی ہٹانا عورت کی عزت، شناخت اور ذاتی آزادی پر سنگین حملہ ہے۔

ایمنسٹی انٹرنیشنل انڈیا کے بیان میں کہا گیا کہ ایسے اقدامات نہ صرف خواتین کے بنیادی حقوق کی خلاف ورزی ہیں بلکہ معاشرے میں خوف اور عدم تحفظ کے ماحول کو بھی فروغ دیتے ہیں۔

عالمی تنظیم نے زور دیا ہے کہ عوامی عہدیداران کو مذہبی آزادی اور خواتین کے وقار کا احترام کرنا چاہیے۔

واضح رہے کہ دو روز  قبل بھارتی ریاست بہار کے وزیراعلیٰ نتیش کمار نے پٹنہ میں ہونے والی ایک سرکاری تقریب کے دوران مسلمان خاتون ڈاکٹر کا نقاب کھینچ تھا، جس کی ویڈیو وائرل ہونے کے بعد دنیا بھر سے شدید ردعمل سامنے آیا ہے جبکہ سوشل میڈیا پر وزیراعلیٰ نتیش کمار کو اس گھٹیا عمل پر شدید تنقید کا نشانہ بھی بنایا جا رہا ہے۔