بنگلادیش کی سیاست میں اہم موڑ، سابق وزیراعظم خالدہ ضیاء کا بیٹا جلاوطنی کے بعدواپس وطن پہنچ گیا

بنگلادیشن کی سیاست میں اہم موڑ،سابق وزیراعظم خالدہ ضیاء کا بیٹا جلاوطنی کے بعد وطن پہنچ گیا

بنگلہ دیش کی سیاست میں ایک اہم پیش رفت سامنے آئی ہے، جہاں بنگلہ دیش نیشنلسٹ پارٹی (بی این پی) کے نائب صدر اور مستقبل کے ممکنہ وزیر اعظم سمجھے جانے والے طارق رحمان 18 برس کی خود ساختہ جلاوطنی کے بعد جمعرات کو وطن واپس پہنچ گئے۔

غیر ملکی خبر رساں اداروں کے مطابق طارق رحمان لندن سے ڈھاکا پہنچے، جہاں پارٹی رہنماؤں اور کارکنوں کی بڑی تعداد نے ان کا استقبال کیا۔ طارق رحمان 2007–08 کے سیاسی بحران کے دوران ملک چھوڑ کر برطانیہ منتقل ہو گئے تھے اور تب سے وہیں مقیم تھے۔

طارق رحمان سابق وزیر اعظم اور بی این پی کی سربراہ خالدہ ضیا کے صاحبزادے ہیں اور انہیں پارٹی میں ایک مضبوط سیاسی کردار اور اپنی والدہ کا جانشین تصور کیا جاتا ہے۔ ان کی واپسی کو آئندہ عام انتخابات کے تناظر میں انتہائی اہم قرار دیا جا رہا ہے۔

واضح رہے کہ بنگلہ دیش میں عام انتخابات 2026 میں متوقع ہیں، جو گزشتہ سال ہونے والی عوامی بغاوت کے بعد پہلی بار منعقد ہوں گے۔ اس بغاوت کے نتیجے میں سابق وزیر اعظم شیخ حسینہ کی 15 سالہ حکومت کا خاتمہ ہوا تھا۔

سیاسی مبصرین کے مطابق طارق رحمان کی وطن واپسی بنگلہ دیش کی سیاست میں نئے اتحاد، انتخابی حکمت عملی اور طاقت کے توازن پر گہرے اثرات مرتب کر سکتی ہے۔